«АЛРОСА» авиахампаанньа Арассыыйа салгын тырааныспарын федеральнай ааҕыныстыбатын сэртипикээтин бэрэбиэркэтин ситиһиилээхтик ааста уонна ФАП-145 быраабылалар ирдэбиллэригэр эппиэттиир сэртипикээти ылла. Бу докумуон авиахампаанньа инженернэй-авиационнай сулууспата ирдэнэр нуормаларга толору эппиэттиирин уонна бэйэлэрин да, атын даҕаны салгын суудуналарын тиэхиньиичэскэй хааччыйыы өҥөтүн оҥорор кыахтааҕын бигэргэтэр.
Авиахампаанньа оҥорон таһаарар баазатын сыанабылын Саха сиринээҕи территориальнай салгын тырааныспарын уокуруктааҕы салалтата ыытта. Ол чэрчитинэн тиэхиньиичэскэй хааччыйыы процесстара, персонал идтигэр бэлэмэ уонна үөрэҕэ, тиэхиньиичэскэй уонна докумуоннаммыт хааччыллыы, хаачыстыбаны уонна көтүү куттала суох буолуутун салайыы систиэмэтэ бэрэбиэркэлэннэ.
«Сэртипикээт баара авиахампаанньа үрдүк тиэхиньиичэскэй идэлээх таһымын бигэргэтэр, былааннааһын түргэтиирин уонна биһиги оҥорон таһаарар инфраструктурабыт сайдыытыгар улахан суолталаах түһүмэҕинэн буолар. Бу кыах уонна эппиэтинэс саҥа таһымыгар киирии, ол биһиэхэ оҥорон таһаарар тиэхиньиичэскэй соруктары түргэнник быһаарарга, ону тэҥэ бэйэбит инженернэй идэлээх таһыммытын сайыннарарга кыаҕы биэриэҕэ», — диэн «АЛРОСА» авиахампаанньа генеральнай дириэктэрэ Игорь Хороших бэлиэтээтэ.
Сэртипикээт дьайыыта Ан-38-100, Ан-38-120, Ан-24РВ, Ан-26, Ан-26-100, Boeing 737-600/700/800/900 сөмөлүөттэргэ, ону тэҥэ Ми-8Т, Ми-8МТВ-1, Ми-171 уонна Ми-26Т бөртөлүөттэргэ тарҕанар.
