Арассыыйа ФНС Саха Өрөспүүбүлүкэтинээҕи салалтата иһитиннэрэринэн, 2025 сылга сир уонна тырааныспар нолуоктарыгар, баайга-дуолга нолуокка уонна НДФЛ-га бэриллиэхтээх нолуоктарын туһунан иһитиннэриилэрэ оҥоһулунна уонна «Нолуок төлөөччү тус кэбиниэтэ» сервергэ, ону тэҥэ «Госуслуги» порталга киллэрилиннэ.
«Нолуок төлөөччү тус кэбиниэтэ» сервергэ холбоммотох нолуок төлөөччүлэргэ иһитиннэриилэр «Арассыыйа почтатын» салааларынан суруктарынан ыытылыннылар. Ол иһин нолуок сулууспата Саха сирин олохтоохторугар почта биллэриилэригэр болҕомтолорун ууралларыгар уонна олорор сирдэринэн почта салааларыттан нолуок иһитиннэриитин ылалларыгар сүбэлиир.
Нолуок уорганынан ааҕыллыбыт нолуок уопсай сууммата 300 солкуобайтан кыра буоллаҕына, нолуок иһитиннэриитэ ыытыллыбат. Бу үс сылга биирдэ оҥоһуллар. Ону таһынан, тустаах чэпчэтиилээх буолан, нолуогу толору төлөөбөт дьоҥҥо иһитиннэрии ыытыллыбат.
Билиҥҥи туругунан 396,4 тыһыынчаттан тахса холбоммут нолуок иһитиннэриитэ оҥоһулунна, олортон 92%-тан тахсата электроннай көрүҥүнэн «Нолуок төлөөччү тус кэбиниэтигэр» уонна «Госуслуги» портал тус кэбиниэтигэр угулунна, хаалбыт чааһа почта сибээһин салааларыгар бэрилиннэ.
Иһитиннэриилэргэ ыйыллыбыт нолуок 2026 сыл ахсынньы 1 күнүгэр диэри төлөнүөхтээх.
