Бүгүн, алтынньы 6 күнүгэр, Дьокуускайга А.С. Пушкин аатынан судаарыстыбыннай академическай нуучча тыйыытырыгар Донецкайдааҕы академическай ыччат тыйаатыра гастрола саҕаланна. Донецк куораттан кэлбит кэлэктиип Саха сирин олохтоохторугар бэйэтин бырагырааматын көрдөрөр. Гастрол алтынньы 11 күнүгэр диэри буолар, биллэриигэ улахан дьоҥҥо уонна оҕолорго анаммыт сэттэ испиктээк баар.
АБ Бэрэсэдьиэнэ Владимир Путин көҕүлээһининэн тэриллибит “Дьиэ кэргэн” бырайыак сыалыгар уонна соруктарыгар сөп түбэһэр гастрол ыытыллар. Култууранан атастаһыы ураты бэлиэтэ Арассыыйа норуоттарын сомоҕолоһууларыгар уонна Саха сиригэр Култуура сылыгар буолар.
Донецкай куорат өрөспүүбүлүкэтээҕи академическай тыйаатыр остуоруйата 1971 сылга Макеев куоракка уобаластааҕы эдэр көрөөччү тыйаатыра тэриллибититтэн саҕаланар. Үбүлүөйдээх 50 сылыгар кэлэктиип репертуары кэҥэтэн уонна көрөөччү сааһын улаатыннаран саҥардыллыбыт ааты ылыммыт. Билигин тыйаатыр Арассыыйа иһинээҕи уонна норуоттар икки ардынааҕы бэстибээллэр гастроллуур бырайыактарга көхтөөктүк кыттар.
“Саха сирэ – гастролбут каартатыгар ураты уонна олус эппиэтинэстээх түһүмэх буолар. Тыйаатыр хамаандата саҥа, истиҥ Саха сирин дьонун кытта көрсөрүн күүтэр”, – диэн кылаабынай дириэктэр бэлиэтээтэ – Донецкай куорат өрөспүүбүлүкэтээҕи академическай ыччат тыйаатырын художественнай салайааччыта Владислав Слухаенко.
Алтынньы 6 күнүттэн Донецкай поэтессата Анна Ревякина айымньытын матыыбынан “Шахтерская дочь” драма гастролу арыйар. Режиссер Максим Жданович туруорбут драмата сэрии кэмигэр дьон ыар дьылҕатын көрдөрөр. Испэктээк саҕаланыыта – 18:00 ч.
Алтынньы 7 күнүгэр Клод Монье “Оскар” пьесатынан Арутюн Киракосян туруоруутун көрдөрүөхтэрэ. Сүрүн ис хоһооно – парижскай миллионер Бертран Барнье дьиэтигэр араас иирсээн, соһуччу көрсүһүү буолар. Саҕаланыыта – 18:00 ч.
Алтынньы 8 күнүгэр 19:00 ч. Ульбрих Хуба “У ковчега в восемь” пьесатынан ырыалаах-тойуктаах испэктээк буолар. Аныгы притча төрүтэ – Библияттан ылыллыбыт Аан дойдутааҕы халаан туһунан. Туруоруу доҕордоһуу, таптал, итэҕэл уонна киһи бэйэтэ оҥорбут быһыытыгар эпиэтинэстээх буолуу тиэмэлэрин таарыйар.
Алтынньы 9 күнүгэр 18:00 ч. Марк Камолетти пьесатын матыыбынан “Ах, уж эти парижане” кэмиэдьийэни артыыстар оонньуохтара. Сюжет кэргэннээх ойох служанкалара Анна хаһаайыннарыттан бэйэ бэйэлэрин уонна кинилэр көрсүүлэрин кистиирин туһунан буолуоҕа.
Алтынньы 10 күнүгэр 18:00 ч. Дмитрий Данилов пьесатынан “Человек их Подольска” испэктээк көрдөрүөхтэрэ. Полиция отделениетыгар доппуруос сыыйа-баайа уйулҕа оонньууга кубулуйар.
Эдэр көрөөччүлэргэ алтынньы 10 уонна 11 күннэригэр 11:00 ч. Николай Носов айымньыларын матыыбынан “Как Незнайка хотел стать” буффонда буолуоҕа. Сүрүн дьоруой бэйэтин кыаҕын билэээри уонна ханна кини бэйэтин көрдөрүөн сөбүн билээри араас дьарыгы боруобалыыр – худуоһунньук, мусукаан уонна айан оҥорон таһаарааччы.
Алтынньы 11 күнүгэр Николай Лесков “Левша” сэһэнин матыыбынан испэктээк гастролу түмүктүөҕэ. Максим Жданович туруоруутугар нуучча маастардарын, киһи дьылҕатын уонна киһи дойдутугар оруолун туһунан кэпсиир.
Тылбаас: Саргылаана Слепцова
