Биир кэлим куоластааһын күнүгэр, балаҕан ыйын 18-20 күннэригэр Үөһээ Бүлүү-Горнай биир мандаттаах быыбардыыр уокуругар Саха сирин народнай депутатын эбии быыбара буолан ааста.
13 №-дээх Үөһээ Бүлүү-Горнайа биир мандаттаах быыбардыыр уокуругун уокуруктааҕы быыбардыыр хамыыһыйа дааннайынан, быыбарга 11 692 быыбардааччы кыттыыны ылла, онон кыттыы 61,93% тэҥ.
Быыбардааччылар испииһэктэригэр куоластааһын бүтэр кэмигэр 18 880 быыбардааччы киллэриллибитэ.
Быыбар бүллүтүөннэригэр түөрт кандидат киллэриллибитэ.
Барыллааһын дааннайынан, быыбардааччылар куоластара маннык түҥэтилиннэ:
“Биир Ньыгыл Россия” баартыйаттан туруоруллубут, «Алмазэргиэнбанк» АКБ АУо, бырабылыанньа бэрэссэдээтэлэ Николай Долгунов. Киниэхэ 5740 быыбардааччы, эбэтэр быыбарга кыттыбыт киһи 49,17% куоластаата.
«Сиэрдээх Россия» социалистическай политическай баартыйаттан туруоруллубут, Горнай улууһун “Бэрдьигэстээх нэһилиэгэ” тыа сирин дьаһалтатын иһинэн үлэлиир “Горный Жилкомсервис» ХЭО дириэктэрэ Анатолий Лю-Фа. Киниэхэ 1489 быыбардааччы, ол эбэтэр 12,75% куоластаата.
КПРФ – Коммунистическая партия Российской Федерации” баартыйаттан туруоруллубут, “Сомоҕо” ХЭО генеральнай дириэктэрэ Дмитрий Петров. Кини туһугар 1368 быыбардааччы, ол эбэтэр 11,72% куоластарын биэрдилэр.
«Саҥа дьон» политическай баартыйа туруорбут, бэйэтэ дьарыктанар Владимир Скрыбыкин. Кини туһугар 2900 быыбардааччы, ол эбэтэр 24,84% куоластарын биэрдилэр.
Куоластааһын хаамыытын кандидаттар, политическай баартыйалар, өрөспүүбүлүкэ Уопсастыбаннай палатата анаабыт кэтээн көрөөччүлэр хонтуруоллаатылар. Быыбар хамыыһыйаларыгар быыбар туһунан сокуону кэһиигэ үҥсүү, сайабылыанньа киирбэтэ. Куоластааһын быыбар сокуонун бары ирдэбилигэр кытаанахтык сөп түбэһиннэрэн ыытылынна.
