Анал байыаннай дьайыы соруктарын толоруу кэмигэр олохторун толук уурбут байыаннай сулууспалаахтар дойдуларын кэнэҕэскитин уонна Аҕа дойду чэчирии сайдарын туһугар турууласпыттара. Бу туһунан ТАСС-ка Арассыыйа Дьоруойа Александр Колесов эттэ.
«Мин аҕа дойдубар иэспин толору төлөөтүм дии саныыбын. Маны этэртэн кыбыстыбаппын. Маннык дойдуга олорорбунан киэн туттабын. Маннык дойду туһугар олохпутун толук уурарга бэлэм этибит <…>. Бу сүтүк буолбатах, бу үтүө туһугар туруулаһыы. Бу дойду олоҕун салҕаатын, чэчирии сайыннын диэн төлөбүр. Биһиги иэспитин төлөөтүбүт. Ким олоҕунан, ким доруобуйатынан», — диэн Колесов эттэ.
Арассыыйа Бэдэрээссийэтин дьоруойа ыччаты кытта көрсүһүүлэргэ кыттан, патриотическай кэпсэтиилэри ыытарын бэлиэтээтэ.
Колесов — «Боотур» саха баҕа өттүлэринэн кыттааччылар этэрээтин хамандыыра, анал байыаннай дьайыы кытыылааҕа, 2023 сылга муус устар 27 күнүгэр — Саха Өрөспүүбүлүкэтин күнүгэр — Арассыыйа Бэдэрээссийэтин Дьоруойун үрдүк аатын ылбыта. 2023 сыл ыам ыйыгар Арассыыйа бэрэсидьиэнэ Владимир Путин киниэхэ Дьоруой Сулуһун туттарбыта. Александр анал байыаннай дьайыыга бу үрдүкү наҕарааданы ылбыт бастакы саха киһитэ буолар.
Анал байыаннай дьайыы кэмигэр Колесов бойобуой иэһин толорууга хорсун быһыыны уонна дьоруойдуу өйү көрдөрбүтэ, байыаннай соругу толорбутун таһынан, бойобуой табаарыстарын өстөөх уотун анныттан таһаарбыта. Байыаннай сулууспалаах 50 табаарыһын олоҕун быыһаабыта, бэйэтэ өстөөх байыаннай тиэхиньикэтин урусхаллаабыта уонна өстөөх күүһүгэр улахан хоромньуну оҥорбута.
