«Ас-үөл» быыстапка-дьаарбаҥка балаҕан ыйын 25 — 27 күннэригэр Дьокуускайга буолуоҕа, диэн өрөспүүбүлүкэ тыа хаһаайыстыбатын уонна ас-үөл бэлиитикэтин министиэристибэтин саайтыгар иһитиннэриллэр. Тэрээһин сүрүн былаһааккатынан Хомсомуол болуоссата талылынна.
Быыстапкаҕа-дьаарбаҥкаҕа өрөспүүбүлүкэ бары улуустарыттан тыа хаһаайыстыбатын оҥорон таһаарааччылар, пиэрмэрдэр уонна аһы-үөлү аҕалааччылар, ону тэҥэ Саха сирин агрооскуолаларын бэрэстэбиитэллэрэ кыттыахтара. Ыалдьыттар эт, балык, үүт аһылыгы, оҕуруот аһын, отоннору, килиэби уонна олохтоох оҥорон таһаарааччылартан атын да табаардары атыылаһар кыахтаныахтара.
Эргиэнтэн ураты, ыалдьыттары дьыалабыай уонна култуура бырагыраамата күүтэр. «Арктикатааҕы судаарыстыбаннай агротехнологическай университекка сэминээр, стратегическай сессия уонна өрөспүүбүлүкэтээҕи «Тыа күүһэ» диэн урбаан форума буолаллар. Ону тэҥэ сахалыы «Дириэктэр» диэн киинэни көрдөрүү уонна өрөспүүбүлүкэ АПК үлэһиттэрин кэнсиэрэ буолуоҕа», — диэн иһитиннэригэ этиллэр.
Быыстапка чэрчитинэн үүнээйигэ, сүөһү иитиитигэр, аһылык уонна оҥорон таһаарыы бырамыысыланнаһыгар идэлээх күрэхтэр ыытыллыахтара. Үрдүк хаачыстыбалаах аһылыгы оҥорон таһаарыыга бастыҥ бородууксуйалар «Үрдүк хаачыстыбалаах аһылыгы оҥорон таһаарыы иһин» диэн күрэскэ кыттыахтара. Агрооскуолаларга туспа күрэхтэр тэриллиэхтэрэ.
Субуотаҕа, балаҕан ыйын 26 күнүгэр, АГАТУ ипподромугар үгэс буолбут ат сүүрдүүтэ ыытыллыаҕа.
«Ас-үөл» быыстапка-дьаарбаҥка тыа хаһаайыстыбатын уонна аһылык бырамыысыланнаһын сайыннарыыга анаммыт Саха сиригэр биир бөдөҥ тэрээһининэн буолар. Кыттааччыларынан дьоҕус уонна орто урбаан үлэһиттэрэ ыҥырыллаллар.
