Учуутал күнүгэр Россия президенэ Владимир Путин Саха сиригэр «Точка будущего» үөрэх комплекса үлэтин саҕалаабытын биллэрдэ. Комплекс официальнай аһыллыытын сиэригэр-туомугар РФ үөрэҕириитин миниистирэ Сергей Кравцов, Саха сирин баһылыга Айсен Николаев, «Новый дом» аһымал пуонда төрүттээччитэ Сергей Чемезов, ону тэҥэ бу пуонда бэрэсидьиэнэ Ирина Белянова кыттыыны ыллылар.
«Хас биирдии оҕо, кини мегаполиска, кыра куоракка, хотугу эбэтэр Уһук Илин бөһүөлэккэ олороруттан тутулуга суох хаачыстыбалаах үөрэхтээһиҥҥэ тэҥ кыахтаах буоларын, судаарыстыба уонна бизнес бииргэ үлэлээһиннэрэ биһиги уопсай сыалбытын дьиҥнээх оҥорорун туһугар соругу туруорабыт. Учууталлар бастыҥ быраактыкаларын, салайар ньымаларын тарҕатыахха наада. Эһиги үөрэххит комплексын курдук бастыҥ тэрилтэлэр кыахтарын туһаныахха. Соторутааҕыта – үөрэх дьыла саҕаланыан иннинэ учууталлары кытта көрсүһүүгэ, баҕар, болҕомтоҕутун уурбуккут буолуо -биһиги ити туһунан кэллиэгэҕит Максим Астраханцевы кытта кэпсэппиппит. Кини 2020 сылтан үлэлиир Иркутскайдааҕы «Точка будущего» дириэктэрэ. Кини уопутун үөрэппиккитин, бу уопуту Саха сирин судургута суох, кытаанах килиимэттээх усулуобуйатыгар тэрийбиккитин билэбин, эрэнэбин ис дьиҥин, чуолаан «Точка будущего» үрдүк сыалын-соругун оҕону иитэр ыалларга, доруобуйаларыгар хааччахтаах оҕолорго уопсай үөрэҕи ылалларыгар да тэҥ кыахтары тэрийиигэ ситиһэргитин. Эһиэхэ иитиллээччилэргит кыайыыларыттан муудараһы, тулуурдаах буолууну, үөрүүнү ис сүрэххититтэн баҕарабын. Саха сиригэр «Точка будущего» оҕолорго да, эһиэхэ да үлэҕит түмүгүнэн дьиҥнээх ситиһиилэргэ суол арылларыгар түмэр дьиэ буоллун. Барыта табыллыа диэн итэҕэйэбин», — диэтэ РФ президенэ.
Маны Сэргэ Владимир Путин «Точка будущего» кэлэктиибин уонна оскуола иитиллээччилэрин учуутал Күнүнэн эҕэрдэлээтэ.
«Айсен Сергеевич, бу бырайыагы олоххо киллэрбит дьон Саха сирин талбыттара мээнэҕэ буолбатах дии саныыбын: эһиги уонна эһиги хамаандаҕыт итинник бырайыактары олоххо киллэрэргэ усулуобуйаны тэрийэргэ элбэҕи оҥороллор. Эһиэхэ улахан махтал», — диэн Владимир Путин эбэн эттэ.
“Точка будущего. Якутия” үөрэх комплексын тутуута киэҥ далааһыннаах бырайыак “Новый дом” аһымал пуонда көҕүлээн, 2020-2026 сылларга олоххо киирбитэ. Комплекс эбийиэктэрин уопсай иэнэ 63 тыһ.кв. м тахса, комплекс территорията 26 га ылар.
«Үөрэхтээһиҥҥэ инвестиция — саамай суолталаах инвестиция. Сергей Викторович Чемезов, Альберт Аликович Авдолян көмөлөрүнэн маннык бэртээхэй үөрэх эбийиэгэ тутуллан, толору судаарыстыбаннайа суох үп суотугар үбүлэнэр. Бу бизнес социальнай эппиэтинэһин чаҕылхай холобура. Манна тэриллибит инфраструктура уонна үөрэх эйгэтэ ханна да суох. Биллэн турар, иккис маннык киин, өссө бөдөҥ, аныгылыы, Дьокуускайга аһыллыбыта — Саха сиригэр эрэ буолбакка, бүтүн Уһук Илиҥҥэ улахан событие», – диэн Саха сирин баһылыга Айсен Николаев бэлиэтээтэ.
Комплекс ирбэт тоҥҥо тутулунна. Дьиэлэр анныларыгар 2600-тэн тахса сыбаайа туруорулунна, сүрүн уһуна 11,8 миэтэрэ. Бырайыактааһыҥҥа буор туруга, хаар уонна тыал дьайыыта, уһун тымныы уонна температура уларыйыылара учуоттаннылар.
«Точка будущего” 1040 оҕону ылыан сөп: 840 оскуолаҕа уонна 200 оҕо саадыгар. Комплекска үөрэтии толору босхо, аһылыкка, үөрэх матырыйаалыгар, оскуола таҥаһыгар ороскуот эмиэ аһымал пуонда үбүнэн оҥоһуллар.
«Үөрэххэ тутар хампаанньа кэмигэр 2700-тэн тахса сайаапка ыллыбыт. Ыаллар маннык үрдүк интэриэстэрэ биһиэхэ улахан эппиэтинэһи сүктэрэр. Иннибитигэр — үрдүкү кылаастары сыыйа арыйыы уонна өрөспүүбүлүкэ үрдүнэн педагогтар үөрэнэр, быраактыкаларын атастаһар уонна аныгы инклюзивнай үөрэхтээһини бииргэ сайыннарар ресурснай киини тэрийии», – диэн «Новый дом» пуонда президенэ Ирина Белянова бэлиэтээтэ.
Үөрэх комплексын састаабыгар бассейннаах спортивнай корпус, лабораторнай корпус, эбии үөрэх корпуһа, 249 массыына миэстэлээх элбэх таһымнаах паркиннаах транспортнай терминал, педагогтарга уонна иитэр ыалларга олорор кыбаартал киирэллэр. Олорор дьиэлэр уонна паркинг үөрэх корпустарын кытта быһа холбоноллор, бу Саха сирин тыйыс килиимэтин усулуобуйатыгар табыгастаах уонна куттала суох сырыыны хааччыйаллар.
“Точка будущего. Якутия” уратытынан биир кэлим үөрэх эйгэтэ, үөрэх бырагыраамата уонна инклюзивноска олоҕурбут киэп буолар, онно төрөппүт уонна иитэр ыаллар оҕолоро бииргэ үөрэнэллэр, ону тэҥэ үөрэхтээһиҥҥэ уонна социализацияҕа туспа сыһыаҥҥа наадыйар оҕолор киирэллэр.
«Хас биирдии оҕо тус-туспа талааннаах: ким эрэ спорка, ким эрэ чопчу наукаҕа эбэтэр искусствоҕа. Улахан дьон соруга — араас хайысхалары боруобалаан, оҕону арыйан биэрэр усулуобуйаны тэрийии. Маннык оскуолаҕа үөрэнии толору босхо, ороскуоту барытын биһиги пуондабыт сүгэр. Саастыылаахтарын сэргэ манна иитэр ыаллар оҕолоро үөрэнэллэр. Кинилэргэ үөрэх комплексын чугаһыгар босхо дьиэ көрүллэр. Оҕолорго болҕомтолоох, үтүө сыһыан, учууталлар көмөлөрө инникитин бастыҥ ситиһиини эрэ биэрэр кыахтааҕар эрэнэбин», – диэтэ Сергей Чемезов.
Комплекс тэриллиитигэр Иркутскайга баар «Точка будущего» уопута уонна экспертизата, ону тэҥэ Саха сиригэр килиимэт усулуобуйата, култуура үгэстэрэ, тыл уонна дьон туохха наадыйыыта учуоттаннылар. Интерьерга национальнай матыып туттуллар, корпустар уонна куйаардар нууччалыы уонна сахалыы ааттардаах буолаллар. Үөрэх бырагыраамаларыгар оҕолору өрөспүүбүлүкэ музыкатын, спордун, историятын уонна култууратын билиһиннэрэр дьарыктар киллэрилиннилэр.
«Новый дом» аһымал пуонданы кытта бырайыак инвесторынан «Эльга» чох хостуур хампаанньа акционера Александр Исаев буолла. Саха сиригэр хампаанньа тутаах хостуур ахтыыба – Эльгатааҕы чох хостуур сир баар. Үөрэх бырайыагын тэрийиигэ кыттыы өрөспүүбүлүкэ кэлэр көлүөнэлэрин сайыннарыыга усулуобуйаны тэрийиигэ бизнес социальнай миссиятын сорҕото буолар.
Комплекс 2026 сыл балаҕан ыйын 1 күнүгэр үлэтин саҕалаата уонна 500-тэн тахса оҕону ылла. Үөрэх сылын бастакы ыйа оҕолору саҥа үөрэх эйгэтигэр адаптациялааһыҥҥа ананна. Толору бырайыактыыр кыамтаны кэлэр үөрэх дьылыгар ситиһэр былааннаахтар.
