Учуутал күнүгэр Саха сирин баһылыга Айсен Николаев өрөспүүбүлүкэ учууталларыгар судаарыстыбаннай наҕараадалары уонна бириэмийэлэри туттарда. Бу туһунан кини MAX-ханаалыгар суруйда.
«Мин учуутал дьиэ кэргэҥҥэ улааппытым, бу идэ төһө тулууру, эппиэтинэһи уонна сылааһы эрэйэрин үчүгэйдик билэбин. Хас биирдии үөрэнээччи ситиһиитэ киниэхэ биирдэ итэҕэйбит, дьоҕурун арыйарга көмөлөспүт уонна туох эрэ сатамматаҕына чугуйбатах учууталыттан саҕаланар», — диэн Николаев суруйда.
Кини быйыл 25 учуутал 9 биридимиэккэ 30 сүүс бааллаах үөрэнээччини бэлэмнээбиттэрин бэлиэтээтэ. Өрөспүүбүлүкэ устуоруйатыгар аан бастаан эбэҥки тылын биридимиэтигэр муҥутуур баал бэрилиннэ. Саха сирин баһылыгын этиитинэн, маннык ситиһиилэр учууталлар үлэлэрин, оҕолор кыһамньыларын уонна төрөппүттэр өйөбүллэрин түмүгэр кэлэр.
Николаев учууталы үөрэнээччи үйэтин тухары умнубатын, оттон выпускник сыллар ааспыттарын да кэнниттэн махтанарын тоһоҕолоон бэлиэтээтэ. Ордук суолталаахтар — настаабынньыктар, бүгүҥҥү күҥҥэ 1700-тэн тахса уопуттаах учуутал эдэр кэллиэгэлэригэр идэлэрин баһылыылларыгар көмөлөһөр.
«Наҕараадалар уонна бириэмийэлэр — учууталларбыт үлэлэрин дьиҥнээхтик билинии. Ол эрээри учууталга саамай күндү наҕараада — кини үөрэнээччилэрэ хайдах дьон буолан тахсалларын көрүү», — диэн Николаев бэлиэтээтэ.
Өрөспүүбүлүкэ баһылыга оскуолаларга эдэр талааннаах исписэлиистэр кэлэллэрин, оттон бастыҥ учууталлар уопуттара саҥа көлүөнэҕэ бэриллэрин туһугар салалта усулуобуйалары салгыы тэрийиэҕэ диэн эттэ. Кини учууталларга чэгиэн доруобуйаны, дьолу-соргуну, махталлаах үөрэнээччилэри уонна кинилэр ситиһиилэриттэн үөрүүнү баҕарда.
