Саха сиригэр навигация түмүктэнэн эрэр. Уунан айан уонна тарыыптар туһунан Саха сирин тырааныспарын министиэристибэтэ иһитиннэрэр.
“Росморречфлот” дьаһалынан, навигация официальнайдык бүппүтүн кэнниттэн уонна муус суол туруор диэри таһаҕаһы таһар үлэни мууһу уйар кылаастаах паромнар ыарахан бааржа арыалдьыттаах толоруохтара.
Дьокуускай — Аллараа Бэстээх паромунан туорааһын үлэтэ барыллаан алтынньы бүтүөр диэри салҕаныа, онтон таһаҕаһы таһыы анал эрэһиимэ — мууһу уйар кылаастаах паромнарынан уонна аҕыйах ахсааннаах флотунан таһыыга көһүөҕэ.
Сүрүн туорааһыннар сабыллыылара барыллаан маннык: Бүлүү өрүскэ — алтынньы 7–10 күннэригэр; Алдан өрүскэ (Мэҥэ-Алдан — Кэскил) — алтынньы 14–16 күннэригэр.
Күн-дьыл усулуобуйатыттан көрөн уларыйыы тахсыан сөп.
Тарыыптар алтынньы ортотугар диэри сайыҥҥытынан хаалаллар. Айылҕа уларыйар кэмигэр таһаҕаһы таһыы сыаната үрдүөҕэ — саҥа тарыыптары «Саха сирин паромнара» ХЭТ биллэриэҕэ. «Саха сирин паромнара» мобильнай сыһыарыыны туруорарга сүбэлииллэр — сыһыарыы RuStore уонна AppStore баар эбэтэр paromonline.sakha.gov.ru саайтка.
Сэтинньиттэн «Жатай — Төхтүр» хайысханан таһаҕаһы таһар үлэни «ЛОРП» ПАУо ледокол арыалдьыттаах ыытыаҕа. Тарыыптары хампаанньа саайтыгар угуохтара.
Навигация официальнайдык сабыллыбытын кэнниттэн тарыыптары судаарыстыба сүрүннээбэт — сыананы таһаҕаһы таһар тэрилтэлэр бэйэлэрэ олохтууллар.
Айылҕа уларыйар кэмигэр дьону таһарга салгын сыттыктаах уонна аэроботтар туһаныллыахтара. Барыта сүрүн хайысхаларынан 30–35, ол иһигэр Дьокуускай — Аллараа Бэстээх хайысханан 25 уу тырааныспара тахсыаҕа.
Саха сирин тырааныспарын министиэристибэтэ уунан айан уонна таһаҕаһы таһыы эрэсиимэ уларыйарынан, тарыыптар үрдүүллэрин учуоттаан, эрдэттэн былаанныырга сүбэлиир.
