Саха норуодунай суруйааччыта, Социалистическай Үлэ Дьоруойа, Саха АССР иккис ыҥырыылаах Үрдүкү Сэбиэтин дьокутаата Д.К. Сивцев-Суорун Омоллоон 120 сылын бэлиэтиир дьаһаллар өрөспүүбүлүкэ үрдүнэн былааннаахтык ыытыллаллар, суруйда Саха парламент саайт.
Ыччаты түмэр пуорум
Алтынньы 5-7 күннэригэр Саха Сиринээҕи Епархия ыччаттарга анаан Сибэтиэй Иннокентий аатынан XVI Духуобунай-сырдатар пуоруму тэрийэн ыытар. Бүгүн, пуорум аһыллыытыгар, Ил Дархан Айсен Николаев, М.К. Аммосов аатынан ХИФУ ректора, Ил Түмэн дьокутаата Анатолий Николаев, билим уонна үөрэх миниистирэ Ньургууна Соколова, Москубаттан уонна улуустартан ыалдьыттар, ыччат, устудьуоннар, о.д.а. кыттыыны ыллылар.
– Билигин тэлэбиисэр, смартфон экрааннарыттан, интэриниэттэн араас саарбах иһитиннэриилэр кутуллан, эдэр дьон өйүн-санаатын сүүйэллэр, сымыйа сыаннастары үөскэтэллэр. Биһиги уопсастыбабыт сиэрдээх, түмсүүлээх, күүстээх буоларыгар уонна иннибит диэки хардыылыырбытыгар үгэс буолбут, дьиҥнээх сыаннастар тирэх буолуохтаахтар. Дьэ ол иһин, маннык пуорумнар, ыччаттар, педагогтар, Епархия салайааччылара, эспиэртэр бииргэ түмсэннэр, үйэлээҕи, кэскиллээҕи, үгэс буолбут сыаннастар итиэннэ дойдубут талар суолларын тустарынан сэһэргэһэллэрэ улахан суолталаах, – диэтэ Айсен Николаев.
Пуорум чэрчитинэн тэриллибит дьаһаллартан биирдэстэрэ Суорун Омоллоон тиһэх үлэтин – Биибилийэ биир саамай чулуу айымньыта «Песнь песней» сахалыы тылбааһын, «Ырыалар ырыаларын» биһирэмэ буолар.
Дмитрий Кононович дьалхааннаах 1990-с сс. сырдык православнай итэҕэли норуокка тарҕатар туһуттан саҥа храмнары тутарга туруорсубута, урукку сиэркэптэри сөргүтэргэ сүҥкэн кылаатын киллэрбитэ. Олоҕун тиһэх сылларыгар Биибилийэ тылбааһын үнүстүүтүн кытары үлэлээбитэ. Саха дьоно Таҥара тылын төрөөбүт тылларынан ааҕыахтаахтар диэн санаанан салайтаран, «Саҥа Кэс тылы» уонна «Саалтыыры» уус-уран өттүнэн эрэдээксийэлээбитэ, «Эргэ Кэс тылтан» «Руфь туһунан кинигэни», «Ырыалар ырыаларын» тылбаастаабыта. Епархия «Саҥа Кэс тылы» 2005 с., «Руфь туһунан кинигэни» 2021 с. бэчээттээбитэ. Быйылгы сылы Суорун Омоллоон 120 сылын бэлиэтээһиҥҥэ анаан, «Ырыалар ырыаларын» туспа кинигэнэн таһаарда.
Санатан эттэххэ, балаҕан ыйын 14 күнүгэр, Суорун Омоллоон төрөөбүт күнүгэр, Епархия Суруйааччылар сойуустарын кытары кыттыһан, «Саха Сиригэр православие. Д.К. Сивцев-Суорун Омоллоон киллэрбит кылаата» диэн төгүрүк остуолу ыыппыта.
Биибилийэ тылбааһын үнүстүүтүн үлэһитэ, богословие эрэдээктэрэ, Епархия Сибэтиэй Суруйуулары тылбаастааһыҥҥа салаатын салайааччы Саргылаана Леонтьева иһитиннэрбитинэн, «Ырыалар ырыаларын» Улуу Суорун өссө эдэр сылдьан, 1937 с. сахалыы тылбаастаан испит, ол эрээри, сотору хаайыллан, ону тохтоппут. Онтон Епархия уонна Биибилийэ тылбааһын үнүстүүтүн көрдөһүүлэринэн, «Саҥа кэс тыл» тылбааһын истиил өттүн көрөр-истэр эрэдээктэринэн үлэлии сылдьан, 2003 с. ыам ыйыгар хаттаан ылсыбыт.
