Тэрээһин сүрүн дьоруойунан көрөөччүлэр бары таптыыр Тоокулара буолуоҕа. Көрөөччүлэри циркэ аптаах эйгэтин уонна ойуулуктар дойдуларын холбуур ураты шоу күүтэр.
Кэнсиэртэн таһынан бэстибээл ыалдьыттарын баай бырагыраама күүтэр:
- Айар маастар-кылаастар: хас биирдии ыалдьыт ойуулук дьоруойдарын кытта саҥаны үөрэнэр кыахтаныаҕа.
- Киинэ саалата: күнү быһа «Тооку» ханаал толору кээмэйдээх киинэлэрин уонна атын биллиилээх ойуулуктарын көрдөрүөхтэрэ.
«Быйыл биһиги үгэс буолбут бэстибээл форматыттан тахсан, «Саха» НКИХ анимациятын сүгүрүйээччилэригэр дьиҥнээх бырааһынньыгы бэлэхтииргэ быһаарыммыппыт. Саха цииркэтин кытта холбоһуктаах бырайыак көрөөччүлэргэ Тоокуну экраҥҥа эрэ көрдөрбөккө, аренаттан кинини кытта сирэй көрсүһэллэригэр кыах биэриэҕэ. Аптаах шоу буолуоҕа диэн эрэннэрэбит», — диэн тэрийээччилэр бэлиэтииллэр.
Санатан эттэххэ, «Тооку Фест» — өрөспүүбүлүкэҕэ тыһыынчанан дьиэ кэргэни түмэр сахалыы анимация улахан бырааһынньыга.
Марфа уонна Сергей Расторгуевтар ааттарынан Саха Судаарыстыбаннай цииркэтигэр, алтынньы 17 күнүгэр, 12:00ч., 16:00 ч. Билсэр төлөпүөн: 8 (914) 223-61-28
