Арассыыйа Бэрэсидьиэнэ Владимир Путин «Валдай» норуоттар икки ардыларынааҕы кулууп мунньаҕар тыл этэригэр, Арассыыйа уонна Кытай бииргэ үлэлэһиилэрин туспа хайысхатын — Хотугу муора суолун (ХМС) сайыннарыыны — ыйда. Судаарыстыба баһылыга Кытай контейнеровоһун ХМС-нан боруобалаан туһаныы чэрчитинэн ааспытын бэлиэтээтэ уонна Арассыыйа бу хайысханы салгыы бииргэ сайыннарыыга эрэнэрин тоһоҕолоон эттэ.
Саха сиригэр ХМС сайдыыта — бу бастатан туран хотугу таһаҕаһы таһыы эрэллээх буолуутун, экэниэмикэ туруктаахтык үлэлиирин уонна дьон олоҕун хаачыстыбатын боппуруоһа. Логистика болдьоҕун кылгатыы уонна сабаҕалааһынын үрдэтии таһаҕаһы, ол иһигэр социальнай суолталаахтары, тиэрдии сыанатын чэпчэтэргэ, ону тэҥэ саҥа инвестиция бырайыактарын олоххо киллэриигэ усулуобуйалары тэрийэргэ кыаҕы биэрэр.
Өрөспүүбүлүкэҕэ «Мохэ – Ньайба» норуоттар икки ардыларынааҕы тырааныспар көрүдүөрүн бырайыага олоххо киирэ сылдьар, бу көрүдүөр үс сүрүн логистика түһүмэҕин холбуур: Дьэлиндэ – Мохэ кыраныысса нөҥүө барар суолга соҕуруу тимир суол түһүмэҕин, Өлүөнэ өрүскэ Аллараа Бэстээх бөһүөлэк оройуонугар киин өрүс түһүмэҕин уонна хотугу муора түһүмэҕин — Лаптевтар муораларыгар «Ньайба» саҥа дириҥ уулаах таһаҕас терминалын.
Трансарктическай тырааныспар көрүдүөрүн сорҕотун быһыытынан, бу бырайыак АТР дойдуларын Арассыыйа Арктикатын маршруттарын кытта ситимниир соруктаах. Бырайыак ону тэҥэ Кытай таһаҕаһын Арҕаа Европа дойдуларыгар тиэрдиигэ олус барыыстаах — айан кэмэ ортотунан икки нэдиэлэнэн кылгаан биэрэр, оттон анал идэлээхтэр сыаналыылларынан, стандартнай контейнердары тиэрдии сыаната билигин альтернатива маршруттардааҕар 10–15% намыһах.
