Дьокуускайга «Өлүөнэ өрүс» диэн үс туомнаах кинигэни Тюмень уобалаһынааҕы «Тобольскайы чөлүгэр түһэрии» пуонда бэлэмнээн таһаарда. Таһаарыы историческай докумуоннары, картографияны, худуоһунньуктар уонна фотографтар үлэлэрин, ону тэҥэ этнографтар хонуутааҕы матырыйаалларын түмэр.
«Мин Дьокуускайга төрөөбүтүм, төрүттэрим 17 үйэҕэ Өлүөнэ өрүс үөһээ салааларыттан тардыылаахтар, ол эбэтэр көҥүл бастакы көһөн кэлбит дьонтон биирдэстэрэбин. Кинигэни Иркутскайга, кыраайы үөрэтэр түмэлгэ эмиэ билиһиннэриллибитэ. Мин Тобольскай пуондаҕа улахан махталбын тиэрдэбин, кини бүтүн Сибииргэ эрэ буолбакка, бүтүн Арассыыйаҕа үлэлиир. Өлүөнэ өрүс — элбэх омук төрүт дойдута, кинигэҕэ манна олорор араас омуктар туһунан кэпсээннэр, сибидиэнньэлэр, бэлиэтээһиннэр бары салааларыгар уонна туомнарыгар түмүллүбүттэр. Бу идиэйэ бүгүн олус суолталаах уонна тоҕоостоох, онон кинигэ кэмигэр таҕыста», — диэн «Өлүөнэ өрүс» кинигэни таҥан таһаарбыт кыраайы үөрэтээччи, уопсастыбаннай диэйэтэл Алексей Зуев бэлиэтээтэ.
«Өлүөнэ өрүс» диэн үс туомнаах кинигэ, Тюмень уобалаһынааҕы «Тобольскайы чөлүгэр түһэрии» пуонда бэлэмнээн, улахан Сибиир өрүстэригэр анаммыт сиэрийэни салгыыр. Манна Өлүөнэни Илин Сибиир уонна Саха сирин хаһаайыстыбаннай укулаата, олохсуйуута уонна култууратын өйдөбүлэ үөскээбит биир сүрүн утаҕын быһыытынан көрөллөр.
Санатан эттэххэ, Дьокуускайга алтынньы 7–10 күннэригэр туруктаах сайдыыга VII Хотугу форум ыытыллар, 40-ча тэрээһин буолуоҕа. Маны таһынан форум чэрчитинэн «Арктика хайысхата: каадырдары Арктикаҕа» диэн VIII эрэгийиэннэр икки ардыларынааҕы билим-быраактыка кэмпириэнсийэ уонна III Норуоттар икки ардыларынааҕы Арктика быраап кэнгириэһэ ыытыллыахтара.
