Уус Алдан улууһун Бэйдиҥэ бөһүөлэгэр түргэн тэтимнээх интернет киллэрдэ. Дьаһал «Ростелеком» хампаанньа инвест-бырагырааматыгар олоҕурда.
Өлтөх нэһилиэгин дьаһалтата нэһилиэнньэни кытта сүбэлэһэн, 20 остуолбаны субуотунньугунан бэлэмнээтэ. Барыта 5,5 килэмиэтир усталаах ситим тардыллан бүттэ. Бу күннэргэ ситим үлэтэ бэрэбиэркэлэнэн, кэлэр нэдиэлэттэн ыаллары түргэн интэриниэккэ холбооһун саҕаланыаҕа, диэн суруйда диэн улуус дьаһалтатын пресс-сулууспата МАХ-ханаалыгар иһитиннэрэр.
Суотту нэһилиэгин Оҕуруоттаах уонна Хоноҕор бөһүөлэктэригэр эмиэ бу бырагырааманан 13,5 км хаабыл тардыллан, билиҥҥи туругунан 63 ыалга оптоволокно ситимэ киирдэ. Нэһилиэк дьаһалтата бэйэ көҕүлээһинин өйүүр бырагырааманан 200 остуолбаны бэлэмнээтэ. Инникитин бу бөһүөлэктэри 100 бырыһыан интэриниэт ситимигэр холбуур сорук турар.
«Ростелеком» Уус Алданнааҕы филиалын салайааччыта Иван Прибылых нэһилиэктэр дьаһалталарын кэлэктииптэригэр, баһылыктарга Константин Алексеевка уонна Василий Баишевка бииргэ үлэлээһиннэрин, сайдыыга кылааттарын иһин махталын биллэрдэ.
