Саха сиригэр Сэбиэскэй Сойуус Дьоруойа Федор Охлопков кэриэһигэр анаммыт чопчу ытыыга үгэс буолбут күрэхтэһиилэр саҕаланыахтара. Быйыл бырагыраамаҕа аан бастаандьоҕус турнир киирдэ.
Алтынньы 8–11 күннэригэр Уһук Илин эрэгийиэннэриттэн 30-тан тахса эдэр оҕо, ол иһигэр «ВОИН» киин сэттэ филиалын хамаандалара, «Сулус» полигоҥҥа күрэхтэһиэхтэрэ.
РФ Бэрэсидьиэнин Уһук Илин федеральнай уокуругар боломуочуйалаах бэрэстэбиитэлэ Юрий Трутнев соторутааҕыта Саха сиригэр үлэ сырыытын чэрчитинэн полигон күрэхтэһиигэ бэлэмин көрдө-иһиттэ.
16–18 саастаах кыттааччылар ытааччы уонна кэтээн көрөөччү-көннөрөөччү буолан бииргэ кыттыахтара. Хас биирдии кыттааччы икки оруолга холонуоҕа, оттон ырааҕа 100-тэн 350 миэтэрэҕэ диэри буолуоҕа.
«Дьоҕус турнир — бу бастатан туран хамаанданан үлэ. Маннык күрэхтэһиилэр дьиссипилиинэни, бэйэлэрин филиалларын уонна эрэгийиэннэрин эппиэтинэһин иитэллэр. Ону таһынан, «ВОИН» киин куурустарын истээччилэригэр турнир ытыыга бэлэмин таһымын хаачыстыбалаахтык көрдөрүөҕэ», — диэн Юрий Трутнев бэлиэтээтэ.
«ВОИН» филиаллара Арассыыйа 24 субъегар, ол иһигэр Уһук Илин эрэгийиэннэригэр үлэлииллэр. Киин 2022 сыллаахха Арассыыйа Бэрэсидьиэнин сорудаҕынан тэриллиэҕиттэн 165 тыһыынчаттан тахса куурус истээччи үөрэннэ.
