Түргэн мобильнай интернет уонна Мегафон сибээһи Саха сирин өссө тоҕус кыра нэһилиэнньэлээх пууннарын олохтоохторо ыллылар. Оператор регионҥа үлэлиир «цифровой тэҥэ суох буолууну туоратыы» федеральнай бырайыак чэрчитинэн бэйэтин ситимин кэҥэттэ.
Мегафон сибээһэ Уус Алдан оройуонун түөрт сэлиэнньэтигэр баар буолла: Саһылыкаан, Элэһин, Дыгдал уонна Тиит Арыы. Ону тэҥэ оператор ситимигэр Чурапчы оройуонун Улахан Күөл, Өлүөхүмэ оройуонун Марха, Эдьигээн оройуонун Бэстээх, Томпо оройуонун Сайдыы уонна Кэбээйи оройуонун Кальвица олохтоохторо холбонуохтарын сөп. Сэлиэнньэлэр бары аҕыйах ахсааннаах категорияҕа киирэллэр, хас биирдиилэригэр 300-тэн аҕыйах киһи олорор.
Хампаанньа техническэй исписэлиистэрэ дэриэбинэлэргэ интернет оптимальнай түргэнин, биир тэҥ сабыытын уонна сигнал туруктаах таһымын хааччыйар үлэни ыыппыттара. Ити олохтоохторго Мегафон ситимигэр аныгы цифровой сиэрбистэргэ киириини арыйда. Туһанааччылар түргэнник көмө көрдүөхтэрин, суһал сулууспалары ыҥырыахтарын эбэтэр быраас онлайн‑консультациятын ылыахтарын сөп.
«Саха сирэ — ураты сир. Биһиги региоммутугар элбэх ыраах уонна ыарахан суоллаах-иистээх, аҕыйах эһилиэнньэлээх пууннар бааллар, кинилэр хаачыстыбалаах уонна туруктаах сотовай сибээскэ наадыйаллар. Биһиги телеком-бүрүөһүнү утумнаахтык кэҥэтэбит — бэйэбит инфраструктурабытын тиһиктээхтик уонна тохтоло суох тутуунан да, атын сибээс оператордарын кытта бииргэ үлэлээһининэн да. Быйыл холбоһуктаах бырайыактар көмөлөрүнэн биһиги ситиммит өссө 1,3 тыһыынча киһиэхэ тиийэр буолла», — диэн Саха Өрөспүүбүлүкэтигэр Мегафон дириэктэрэ Наталья Некрасова эттэ.
