«СӨ ОДьКХ» ГУТ үлэһиттэригэр хамнас иэһин төлүүр туһунан боппуруоһу өрөспүүбүлүкэ бырабыыталыстыбата ураты хонтуруолга тутар. Бу туһунан «Тэтим» араадьыйаҕа «Былааһы кытта кэпсэтии» биэриигэ өрөспүүбүлүкэ үбүн миниистирин эбээһинэһин толорооччу Иван Алексеев Үөһээ Халыма улууһуттан эрийбит араадьыйа истээччи ыйытыытыгар хоруйдаан иһитиннэрдэ.

««СӨ ОДьКХ» ГУТ  — туспа хаһаайыстыбаннай субъект, кини үлэһиттэрэ өрөспүүбүлүкэ бүддьүөтүттэн хамнас ылбаттар. Тэрилтэ бэйэтэ оҥорбут хомунаалынай өҥөтүн иһин дохуоттаах. Ону таһынан, тэрилтэ бүддьүөттэн тарыыптар икки ардыларынааҕы араастаһыыга субсидияны ылар. Ол эрэн, тэрилтэ үлэһиттэригэр хамнас иэһин төлүүр туһунан боппуруоһу бырабыыталыстыба ураты хонтуруолга тутар. Сотору кэминэн үөскээбит иэс төлөнүөхтээх, бу биһиги инники күөҥҥэ тутар сорукпут», — диэтэ Иван Алексеев.

Ону сэргэ спикер тарыыптар икки ардыларынааҕы араастаһыыга субсидиялар тэрилтэҕэ болдьоҕун иннинэ киирэллэрин тоһоҕолоон бэлиэтээтэ.