Бу нэдиэлэҕэ Саха сирин хоту өттүгэр -20 кыраадыска тиийэ тымныы күүтүллэр. Сөҥүүлээх уонна сөкүүндэҕэ 25-30 миэтэрэҕэ тиийэ түргэннээх тыаллаах тымныы күнү-дьылы Арктикатааҕы циклон аҕалар. Тымныы салгын нэдиэлэ бүтүүтэ киин улуустарга тиийэр уонна аныгыскы нэдиэлэҕэ дылы турар. Саха сиринээҕи УГМС метереологическай уонна агрометереологическай сабаҕалааһыннарга отделын начаалынньыга Саргылана Никитина күн-дьыл туругун иһитиннэрдэ.
“Арктика үрдүнэн хаардаах уонна сөҥүүлээх циклон ааһар. Өлүөнэ уонна Дьааҥы өрүстэр алын тардыыларынан инчэҕэй хаар түһэр. Бу күннэргэ Арктика кытылыгар тыал түргэнэ сөкүүндэҕэ 15-20 миэтэрэҕэ тиийэр. Алтынньы 1 уонна 2 күннэригэр тыал сөкүүндэҕэ 25-30 миэтэрэҕэ тиийэ күүһүрэр. Түүн салгын температурата -4…+1 кыраадыс, халлаан ырааһырдаҕына -4…-9 кыраадыс, күнүс +4…+9 кыраадыс буолар. Алтынньы ый саҕаланыытыгар хотугулуу-илин өттүгэр -9…-14 кыраадыска диэри түһэр, хайаларга халлаан ырааһырдаҕына -15…-20 кыраадыс, оттон күнүс +1…+6 кыраадыс буолар”, — диэн Саргылана Никитина кэпсээтэ.
Саха сирин арҕаа уонна киин өттүгэр кыра инчэҕэй хаар күүтүллэр. Киин улуустарга салгын температурата түүн 0…-5 кыраадыс, халлаан ырааһырдаҕына -5…-10 кыраадыс, күнүс +3…+8 кыраадыс күүтүллэр.
“Нэдиэлэ бүтүүтэ Арктикатааҕы циклон өрөспүүбүлүкэни сабардыа. Циклон тымныыта бээтинсэ уонна субуота күннэригэр ааһар. Бастаан арҕаа уонна хотугулуу-илин диэки ааһар, ол кэнниттэн киин улуустарга сорох сирдэринэн сөҥүү түһэр. Өрөспүүбүлүкэ киинигэр ардах уонна инчэҕэй хаар түһэр, өрөбүллэргэ – хаар. Онон алтынньы 3 уонна 4 күннэригэр салгын температурата күнүс 0…+5 кыраадыс буолар. Ону тэҥэ сөкүүндэҕэ 9-14 миэтэрэҕэ тиийэ түргэннээх тыал күүтүллэр. Арҕаа улуустарга салгын температурата +4…+12 кыраадыс буолуоҕа”, – диэн Никитина иһитиннэрдэ.
Тымныы Арктикатааҕы салгын аныгыскы нэдиэлэҕэ салҕанар. Салгын температурата нуултан аллараа түһэн саҕалыыр. Никитина бэлитээбитинэн, бу Саха сиригэр балаҕан ыйын бүтүүтүгэр уонна алтынньы саҕаланыытыгар буолар нуормаҕа чугас.
Синоптик этэринэн, Амуурунан ааһар монгуоллааҕы циклон өрөспүүбүлүкэ соҕуруу кыраныыссатын хабар. Онон Нерюнгри улууһугар икки күннээх ардах, хайалаах сирдэринэн инчэҕэй хаар күүтүллэр. Салгын температурата +9…+14 кыраадыска тиийиэ. Соҕуруу өттүгэр бүгүн уонна сарсын өрөспүүбүлэкэҕэ саамай сылаас күн-дьыл – +8…+15 кыраадыс.
