Дьокуускай куорат суута 2002 сыллаах төрүөх кыыс холуобунай дьыалатын көрдө. Кини омук дьонун дьиэтигэр сокуоннайа суох учуокка туруоруунан дьарыктаммыт. Бу туһунан Дьокуускай куорат суутун пресс-сулууспата иһитиннэрэр.
Ааспыт сыл ыам ыйыгар кини омук дьонун учуокка туруоруунан сокуоннайа суох дьарыктанарга быһаарыммыт уонна мессенджер бөлөҕөр биллэрии таһаарбыт: «Миграционнай учуокка туруорууга көмөлөһөбүн». Кини чааһынай дьиэ туттарыгар харчы киллэринэр былааннааҕа.
2025 сыл ыам ыйын 16 күнүттэн атырдьах ыйын 28 күнүгэр диэри сууттанааччы миграция боппуруостарын отделыгар Кыргызстантан кэлбит 17 киһини харчыга «пропискалаабыт». Омук дьонугар олорор дьиэ бэриллибэтин уонна онно олорботторун билэ-билэ, кинилэртэн уопсайа 170 тыһыынча солкуобайы ылбыт.
Быйыл олунньуга кини эмиэ итинник сыалтан өссө үс Кыргызстан олохтооҕун учуокка туруорбут, кинилэргэ дьиэ биэрэр былаана суох. 30 тыһыынча солкуобайы ылбыт.
Суут мунньаҕар сууттанааччы буруйдааһыны кытта сөбүлэспит, буруйун толору билиммит уонна суут дьыалатын ураты бэрээдэгинэн көрөргө көрдөспүт. Адвоката уонна судаарыстыбаннай буруйдааччы утарбатахтар.
Сымнатар миэрэ быһыытынан суут буруйу билиниини, кэмсиниини, үчүгэй характеристикатын, эдэр сааһын уонна сорох омук дьонун учуоттан устарга дьаһаллары ылыммытын учуоттаабыт.
Суут РФ ХК 322.3 ыстатыйатынан (омук гражданинын Арассыыйа Федерациятыгар быстах кэмҥэ олорор сиригэр сокуоннайа суох учуокка туруоруу) сууттанааччыны буруйдааҕынан билиннэ. Баай-дуол балаһыанньатын учуоттаан, киниэхэ 150 тыһыынча солкуобай кээмэйдээх ыстараабы икки сылга болдьохтоон, ый аайы 6 250 солкуобайынан төлүүргэ анаатылар.
