Аан дойдутааҕы көс оонньуулар кыайыылаахтарын, призердарын Дьокуускайга эҕэрдэлээтилэр. Саха сирин спортсменнара Россия регионнарын ортолоругар саамай элбэх мэтээли ылан, норуоттар икки ардыларынааҕы бөдөҥ күрэхтэһиилэргэ ситиһиилээхтик кытыннылар. Пресс-конференцияны балаҕан ыйын 28 күнүгэр «Сахамедиа» өрөспүүбүлүкэтээҕи медиа-кииҥҥэ ыыттылар, диэн иһитиннэрэр ЯСИА.
Оонньуулар кыттыылаахтарын Саха сирин бырабыыталыстыбатын бэрэссэдээтэлин солбуйааччы Сергей Местников, физкультура уонна спорт миниистирэ Леонид Спиридонов, култуура уонна духуобунай сайдыы миниистирэ Афанасий Ноев, мас-рестлинг Аан дойдутааҕы Федерациятын вице-президенэ Александр Ким-Кимэн, Россия национальнай уонна олимпийскайа суох спорт көрүҥнэрин кэмитиэтин (КННВС) вице-президенэ Михаил Ершов, спорт национальнай көрүҥнэрин өрөспүүбүлүкэтээҕи киинин дириэктэрэ Геннадий Васильев эҕэрдэлээтилэр.
«Кыргыстааҥҥа аан дойдутааҕы көс дьон оонньуулара үрдүк таһымҥа ыытылыннылар. 106 дойдуттан спортсменнар кытыннылар. Саха сириттэн спортсменнар Россия сүүмэрдэммит хамаандатын састаабыгар киирсэн, ситиһиилээхтик кытыннылар. Дойду хамаандатыгар барыта 236 спортсмен киирбитэ, олортон 24-дэ биһиги өрөспүүбүлүкэбититтэн, кинилэр араас истиэпэннээх тоҕус мэтээли ыллылар. Ити Россия сүүмэрдэммит хамаандатыгар үһүс бочуоттаах миэстэни ыларга кыах биэрдэ», — диэн Сергей Местников кэпсээтэ.
Ох саанан ытааччы Клара Спиридонова өрөгөйү биллэ. Кини үс араас көрүҥҥэ мэтээли ылла ылла. Оонньууларга аан бастаан хапсаҕай көрдөрүллүбүтэ. Араас дойдулар 24 бэрэстэбиитэллэриттэн саамай күүстээхтэринэн Саха сириттэн Никита Хабаров буолла.
Мас-рестлиҥҥэ үрүҥ көмүс призердарынан Ариан Григорьев, Василий Захаров буоллулар, боруонса наҕараадалары Денис Федоров уонна Саина Седалищева аҕаллылар. Тогуз коргоол оонньууга Марат Ляшеев уонна Богдан Журавлев хамаандаҕа үһүс миэстэни аҕаллылар.
Сергей Местников Кыргыстааҥҥа хабылык уонна хаамыска остуол оонньуутун бэрэстэбиитэллэрэ эмиэ айаннаабыттарын бэлиэтээтэ. Кинилэр күрэхтэһии элбэх кыттыылаахтарыгар улахан интэриэһи үөскэппит маастар-кылааһы көрдөрдүлэр. Өрөспүүбүлүкэ вице-премьерэ спортсменнарга, ону тэҥэ култуура бырагырааматын кыттыылаахтарыгар махтал суруктары туттарда.
«Биһиги спортсменнарбыт бэйэлэрин түмүктэринэн Саха сиригэр спорт национальнай көрүҥнэрин сайыннарыыга улахан үлэ ыытылларын дакаастаатылар. Оонньууларга сыһыаннаан эттэххэ, үгүс экспертэр аһыллыы сиэрэ-туома Олимпийскай оонньуулартан да ордугун бэлиэтииллэр. Көс дьон оонньуулара улахан болҕомтону ыллылар, аан дойдуга көрдө. Салгыы да сайдыахтара диэн эрэнэбин. Кэлэр аан дойдутааҕы көс дьон оонньууларын Россия ылыаҕа — Татарстаҥҥа ыытыллыахтара», — диэн Леонид Спиридонов бэлиэтээтэ.
Афанасий Ноев саха дьоно аан дойдутааҕы көс дьон оонньууларын култуурунай чааһыгар эмиэ дьоһуннаахтык кыттыбыттарын эттэ. Саха сирэ бэйэтин национальнай үгэстэрин, култууратын, историятын харыстыыр кыахтаммытын көрдөрдүлэр.
