Өрөспүүбүлүкэтээҕи “Ас-үөл-2026” быыстапка-дьаарбаҥкаҕа 7 улуустан уонна Дьокуускайтан 16 агрооскуола ситиһиилэрин, астарын көрдөрдүлэр уонна үлэлэрин туһунан кэпсээтилэр. Өрөспүүбүлүкэ тыа хаһаайыстыбатын уонна ас-үөл бэлиитикэтин министиэристибэтэ оскуола икки ардынааҕы күрэх тэрийэн, анал ааттары биллэрдэ: “Бастыҥ оскуола таһынааҕы учаастак”, “Бастыҥ оскуола пиэрмэтэ”, “Үрдүк хаачыстыбалаах аһылыгы оҥорон таһаарыы иһин”, ону таһын “Бастыҥ Арктика агрооскуолата” ыраахтан олорон күрэс.
“Быйыл күрэххэ оскуолалар үчүгэйдик бэлэнэммиттэр, учаастактарын интэриэһинэйдик киэргэппиттэр уонна үрдүк таһымнаахтык үлэлэрин кэпсээтилэр. Уопсайа 6350 кэриҥэ бородууксуйа көрдөрүүгэ турда: оскуола таһыгар үүннэриллибит оҕуруот аһа, чэй арааһа, барыанньа, туустаммыт оҕуруот аһа, мүөт, сироп, бурдук, килиэп уонна минньигэс ас, ну таһынан бэлэх бокстар, киэргэллэр, сувенирдар уонна илии оҥоһуктара. Министиэристибэ аатыттан хас биирдии оскуолаҕа, үөрэнээччигэ, үөрэтээччигэ уонна күрэххэ кытыыбыт салайааччыга махтанабын”, — Саха сирин тыа хаһаайыстыбатын уонна ас-үөл бэлиитикэтин миниистирин солбуйааччыта Сахаяна Павлова бэлиэтээтэ.
Күрэх түмүгүнэн кыайыылаахтар билиннилэр.
“Бастыҥ оскуола таһынааҕы усчаастак” анал аат:
I үктэллээх кыайыылааҕа – Е.Е. Эверстов аатынан Кэбээйи орто оскуолата;
II үктэллээх кыайыылааҕа – П.Н. уонна Н.Е. Самсоновтар ааттарынан Хатас орто оскуолата;
III үктэллээх кыайыылааҕа – Амма улууһун Бөтүҥ орто оскуолата.
“Бастыҥ оскуола пиэрмэтэ” анал аат:
I үктэллээх кыайыылааҕа – Чурапчы улууһун С.Т. Захаров аатынан Төлөй орто оскуолата;
II үктэллээх кыайыылааҕа – Горнай улууһун В.Д. Лонгинов аатынан Атамай орто оскуолата;
III үктэллээх кыайыылааҕа – Чурапчы улууһун Г.П. Башарин аатынан Сылаҥ орто оскуолата.
“Үрдүк хаачыстыбалаах аһылыгы оҥорон таһаарыы иһин” анал аат:
I үктэллээх кыайыылааҕа – Мэҥэ Хаҥалас улууһун В.П. Ларионов аатынан Майа орто оскуолата;
II үктэллээх кыайыылааҕа – Кэбээйи улууһун И.Е. Левин аатынан Танара орто оскуолата;
III үктэллээх кыайыылааҕа – Мэҥэ Хаҥалас улууһун Дмитрий Таас аатынан Хорообут орто оскуолата.
Ыраахтан олорон күрэххэ “Бастыҥ Арктика агрооскуолата” анал ааты ыллылар:
I үктэллээх кыайыылааҕа – Үөһээ Дьааҥы улууһун Боруулаах орто оскуолата;
II үктэллээх кыайыылааҕа – Үөһээ Дьааҥы улууһун Сартаҥ орто оскуолата;
III үктэллээх кыайыылааҕа – Үөһээ Дьааҥы улууһун Арыылаах орто оскуолата.
Өрөспүүбүлүкэтээҕи быыстапка-дьаарбаҥка дойду бэрэсидьиэнэ Владимир Путин туруорбут соругун ситиһэргэ туһаайыллар – 2030 сылга диэри агропромышленнай бородууксуйа оҥорон таһаарыытын кээмэйин 2021 сыллааҕы таһымтан 25%-тан итэҕэһэ суох элбэтии.
Ил Дархан Айсен Николаев төрүт аһылыгы оҥорон таһаарыы туһунан ыйааҕынан 2030 сылга бородууксуйаны 1,5 төгүл улаатыннарар сорук турда.
Тылбаас: Саргылаана Слепцова
