Саха сирин спортсменнара Кыргызстааҥҥа буолан ааспыт аан дойдутааҕы “Кочевниктар оонньууларыгар” алта көрүҥҥэ кыттан, икки кыһыл көмүс, икки үрүҥ көмүс уонна биэс боруонса мэтээли ылары ситистилэр.
Быйыл хапсаҕайы Оонньуулар бырагыраамаларыгар аан бастаан киллэрдилэр. Кыайыылааҕынан Никита Хабаров эрэллээхтик таҕыста. Турнир тухары кини үрдүк тиэхиньиичэскэй бэлэмнээҕин, утарылаһааччытын кытта киирсэргэ дьулуурдааҕын көрдөрөн, Арассыыйаны аан дойду таһымыгар чиэстээхтик көмүскээтэ.
Саха сирин охчута Клара Спиридонова үс көрүҥҥэ биир кыһыл көмүс уонна икки боруонса мэтээли ылла. “Кэриэй сыалыгар” ситиһиитэ кинини 2026 сыл алтынньы бүтүүтэ Соҕуруу Кэриэйэҕэ ыытыллыахтаах аан дойду чөмпүйэнээтигэр сүүмэрдэнэригэр кыаҕы биэрдэ.
Оонньуулар түмүктэринэн, Арассыыйа хамаандата мас тардыһыыга биэс мэтээли — үс үрүҥ көмүһү уонна икки боруонсаны — ылла. Үрүҥ көмүс призёрунан саха бөҕөстөрө Ариан Григорьев (70 кг диэри) уонна Василий Захаров (90 кг диэри) буоллулар. Боруонсаны Саина Седалищева (75 кг диэри) уонна Денис Фёдоров (90 кг үөһэ) ыллылар.
«Овари» арҕаа Африка өйүн оонньуутугар Арассыыйа хамаандатын Алтайтан уонна Саха сириттэн спортсменнар, ол иһигэр Ая Давыдова уонна Инесса Белолюбская, көрдөрдүлэр. Саха сирин дьахталларын хамаандата төрдүс миэстэни ылла.
«Тогуз коргоол» күрэхтэһиитигэр 53 дойдуттан 126 спортсмен кытынна. Арассыыйаны түөрт саха спортсмена көрдөрдө. Эр дьон хамаандата Марат Ляшеев уонна Богдан Журавлёв састааптаах боруонса мэтээли ылла. Дьахталлар хамаандалара алтыс миэстэҕэ таҕыста, састаабыгар Инесса Белолюбская уонна Ая Давыдова бааллар.
Кыргызтар «ордо» оонньууларыгар Арассыыйаттан Саха сириттэн түөрт спортсмен Андрей Захаров, Олег Андреев, Кэскил Михайлов, Ньургун Семёнов уонна Хакасия спорсменнара кытыннылар. Арассыыйа хамаандата алтыс миэстэҕэ таҕыста.
Саха сирэ “Кочевниктар оонньууларыгар” национальнай көрүҥнэри төрүттээбит эрэгийиэннэртэн биирдэстэрэ. Саха спортсменнара мас тардыһыыга, хапсаҕайга, төрүт ох саанан ытыыга, ордоҕо, тогуз коргоолго уонна оварига кытыннылар. Ону таһынан, хабылык уонна хаамыска Оонньуулар көрдөрөр бырагыраамаларыгар киирдилэр.
