Нерюнгри улууһуттан төрүттээх АБДь бэтэрээнэ Александр Кутулевскай дьиэҕэ туттуллар миэбэли уонна олох-дьаһах тиэхиньикэтин оҥорон таһаарар бэйэ дьыалатын арынна.
“Аҕа дойдуну көмүскээччилэр” судаарыстыба пуондатын Саха сиринээҕи филиалын үлэһиттэрэ урбаанньыт идеятын олоххо киллэрэргэ көмөлөстүлэр. Докумуону бэлэмнээһиҥҥэ пуонда социальнай сүрүннээччитэ Алена Булгакова көмөлөстө.
Биисинэһи арыйар мэктиэ ылан, Александр атын АБДь бэтэрээнин Илья Силенконы кытта бэлиэр анал тэрил уонна матырыйаал ылан саҕалаатылар.
“Сүрүнэ — саҕалааһын, оттон сайдыыга былааммыт өссө да элбэх”, – диэн кини бэлиэтиир.
Александр Кутулевскай Нерюнгри улууһугар төрөөбүт уонна уулааппыт. 2001 сыллаахха Уссурийск куоратыгар десант (ВДВ) спецнаһыгар разведчигынан сулууспулаабыт. Оттон демобилизация кэннэ чох тэрилтэтигэр харабылынан үлэлээбит. 2022 сылга атырдьах ыйыгар бэйэтин баҕатынан АБДь сиригэр барбыт. Онно көрдөрбүт хорсун уонна хоодуот быһыытын иһин анал биэдэмэстибэ наҕараадаларын ылбыт.
Билигин бэтэрээн Беркакиттааҕы казак хуторын уопсастыбатыгар киирэр уонна ыччат патриотическай иитиитигэр көхтөөхтүк кыттар. Кини улууһун оскуолаларыгар куруук “Хорсун быһыы уруогун” ыытар. Оскуола оҕолоругар Аҕа дойдуга тапталы, үгэстэргэ ытыктабылы уонна бэйэни сыаналыыр иэйиини үөскэтэр.
Александр этэринэн, кини эйэлээх олоххо төннөрүгэр уонна анал суолун буларыгар чугас дьонун уонна байыаннай доҕотторун өйөбүллэрэ көмөлөспүттэр. “Мин дьиэ кэргэним – мин тирэҕим”, – диэн бэлиэтиир. Кини олоххо көхтөөх позицията уонна сөбүлүүр дьарыгын идэҕэ кубулутар баҕа санаата саҥа дьыаланы арынарыгар тирэх буолбуттар.
