Гражданскай уопсастыбаны сайыннарыыга Саха Өрөспүүбүлүкэтин Ил Дархан граннарын күрэҕэр сайаапкалары хомуйуу түмүктэннэ. Саха сирин ыччат дьыалаларыгар уонна социальнай коммуникацияларга министиэристибэтин көрдөрүүтүнэн, күрэххэ 184 коммерческайа суох тэрилтэттэн 206 сайаапка киирбит.
«Көрдөнүллүбүт үп уопсай кээмэйэ 229 мөлүйүөн солкуобайтан тахсар. Кыттааччылар өрөспүүбүлүкэ 22 оройуонуттан уонна куоратыттан сайаапка биэрбиттэр. Көхтөөхтөрүн Дьокуускай КСТ-лэрэ көрдөрдүлэр – өрөспүүбүлүкэ киин куоратыттан 95 сайаапка киирдэ.
Ньурба оройуонуттан – 15, Чурапчы улууһуттан – 11, Нам улууһуттан – 10 уонна Уус Алдан улууһуттан – 9 сайаапка», – диэн министиэристибэҕэ иһитиннэрдилэр.
Граннарга күрэх 2020 сылтан ыла өрөспүүбүлүкэ Ил Дархана Айсен Николаев ыйааҕынан ыытыллар уонна социальнай суолталаах көҕүлээһиннэри биир күүстээх өйөөһүнүнэн буолла.
Билиҥҥи күрэх уопсай пуондатын кээмэйэ 40 мөлүйүөн солкуобайтан тахсар. Үп 11 хайысханан араарыллыбыт, ол иһигэр – патриотическай иитии (8,5 мөл. солк.), баҕа өттүнэн сайдыыны сайыннарыы (8,2 мөл.), ыччат бэлиитикэтэ (5 мөл.), култуура уонна урамньы (5,5 мөл.), дьиэ кэргэни уонна оҕону өйөөһүн (3,3 мөл.), ону таһынан билим, үөрэх, доруобуйа харыстабыла, гражданскай уопсастыба институттарын сайыннарыы, олохтоох уопсастыбаннай салайыныылар, адаптивнай спорт уонна коррупцияны утары охсуһуу.
Тэҥнээн көрдөххө, 2025 сыллааҕы күрэх түмүгүнэн 67 бырайыак 93,6 мөлүйүөн солкуобайтан тахса уопсай үптээх өйөбүлү ылбыта. Ол саҕана 27 муниципальнай оройуонтан уонна куораттааҕы уокуруктартан 325 тэрилтэлэртэн 388 сайаапката киирбит.
Күрэх түмүгүнэн кыайбыт бырайыактар 2026 сыл сэтинньи 1 күнүттэн олоххо киириэхтэрэ. 12 ый устата КСТ-лэргэ уонна 24 ыйга диэри – уопсастыбаннай туһалаах өҥөлөрү оҥорооччулар реестрдэригэр киирбит тэрилтэлэргэ.
Саха сирин Ил Дарханын граннарын күрэҕин элбэх хайысхата үксэ Арассыыйа Бэрэсидьиэнэ Владимир Путин көҕүлээһининэн олоххо киирэр «Ыччат уонна оҕолор» национальнай бырайыак сыалларын кытта сөп түбэһэр.
Тылбаас: Дария Сибирякова
