Атырдьах ыйын 24 күнүгэр Аллайыаха оройуонун Чокурдаах бөһүөлэгэр овцебык киирбит. Кыһыл кинигэҕэ киирбит кыылы оройуоннааҕы «Сахаэнерго» үлэһиттэрэ бэлиэтии көрбүттэр.
Ыстаадатыттан туора барбыт кыылы быыһааһыҥҥа полициялар, баһаарынайдар, «Кыталык» нацпарк уонна экологическай надзор инспекциятын үлэһиттэрэ кыттыбыттар. Уунан ыстаран кинини туундараҕа тахсар суол диэки ыыппыттар.
«Путь развития» редакцията иһитиннэрбиттэринэн, овцебык бөһүөлэккэ икки чаас кэриҥэ сылдьыбыт. Испэсэлиистэр бу үс саастаах атыыр диэн сабаҕалыыллар.
Былырыын атырдьах ыйыгар Чокурдаахха эмиэ соҕотох овцебык дэриэбинэҕэ киирэн күн устата сылдьан баран барбыта.
Овцебык Саха сирин Кыһыл кинигэтигэр киллэриллибитэ. Кини ахсаана билигин түөрт тыһыынча кэриҥэ. Бу кыыллар Булуҥ, Анаабыр, Аллайыаха, Аллараа Халыма, Абый, Эдьигээн, Өлөөн, Усуйаана уонна Эбээн- Бытантай оройуоннарыгар баалар.
«Путь развития» хаартыскалара
