«Госуслуги» порталга эр-ойох буолуу дуогабарын оҥорорго аналлаах сиэрбиһи үлэлэттилэр. Бу туһунан вице-премьер Дмитрий Григоренко аппараатыгар сигэнэн, РИА Новости иһитиннэрэр.
Саҥа сиэрбиһи «Нотариуска көрдөһүү» диэн «олох түгэнин» чэрчитинэн үлэлэттилэр. Билигин ыал буолаары сылдьааччылар уонна номнуо ыал буолбут дьон эр-ойох буолуу дуогабарын барылын оҥорон, баай-дуол сыһыаннаһыыларын усулуобуйаларын онлайн бэлиэтиир кыахтаннылар.
Өҥөнөн туһанар туһугар порталга «Эр-ойох буолуу дуогабарын түһэрсии» диэн сирэйгэ киирэн докумуону электроннай көрүҥүнэн толоруохха наада. Салгыы нотариуска бигэргэтии ирдэнэр.
