Тыа хаһаайыстыбатын миниистирэ Александр Атласов Таатта уонна Томпо улуустарыгар от үүнүүтүн билсэ сырытта. Бу туһунан https://www.instagram.com/p/CRcz_YMsP5h/?utm_medium=share_sheet суруйар.
Таатта улууһугар Кыйы, Чөркөөх, Харбалаах оттуур сирдэрин көрдүлэр. От үүнүүтэ алаас сирдэргэ суоҕун кэриэтэ, куура хатан хаалбыт. Таатта улууһун баһылыга Михаил Соров сабаҕалыырынан улуус иһигэр, иһэ үлүннэҕинэ, былааннаммыт оттон 85% ылыа этибит диир. Ону да бу хаалбыт бириэмэҕэ кыратык ардах эҥин түһэн ылара буоллар. Таатталар төһө кыалларынан улуус иһигэр оттуур былааннаахтар. Билигин нэһилиэктэр истэригэр мобильнай биригээдэлэри тэрийэн ыраах үрэх бастарыгар ыытаары сылдьаллар.
Томпо улууһугар Сайдыы, Саһыл, Кириэс -Халдьаайы уонна Мэҥэ-Алдан нэһилиэктэригэр от үлэтин хаамыытын кытта билистэ. Улууска от үүнүүтэ биллэ ыарахан, аны маныаха, эбиитин ойуур баһаардара тураннар оттуур ходуһалар умайбыттар. Улуус иһигэр от былааныттан 40 бырыһыанын ыллахха үөрүү дииллэр.
Ыраах ыытан оттотуоҕу, оттуур сир суоҕа атахтыыр. Онон биирдилээн дьон, ыал үрэх баһа кыра сирдэргэ илиинэн оттуурга күһэллэр.
Кириэс-Халдьаайыга 300-тэн тахса ынах сүөһүлээх икки улахан бааһынай хаһаайыстыба үлэлии-хамсыы олорор. Кинилэргэ ыарахан балаһыанньа үөскээбит. Күн бүгүн, фермердэр бэйэлэрин ыһыы уонна оттуур ходуһаларыттан 30% эрэ оту ылар кыахтаахпыт дииллэр.
Аны туран, өссө биир сытыы боппуруос оту тиэйиигэ-таһыыга сытар. Нэһилиэктэр Алдан өрүс уҥуор турар буолан, кыһыҥҥы өрүс суола турдаҕына биирдэ тиэйэллэр. Онон кыһыҥҥы суол аһыллыар диэри от булар уустук.
Тыа хаһаайыстыбатын министиэристибэтэ мобильнай биригээдэлэри тэрийэн ыытыыга көмө оҥорор. Уматыкка харчы көрөр. Маны таһынан, оту тиэйиигэ-таһыыга, айанын ороскуотун уйунууга көмө көрүллэр.
