Булуҥ улууһун Тиксии бөһүөлэгэр киин библиотекаҕа сэрии кэминээҕи оҕолор мустан, ирэ-хоро кэпсэттилэр, ааспыты ахтан аастылар.
Бырааһынньыгы инбэлииттэр уопсастыбаларын бэрэссэдээтэлэ Надежда Апросимова уонна ааҕар саала үлэһиттэрэ тэрийдилэр. Тэрээһини Вуталина Стручкова иилээн-саҕалаан ыытта.
2016 сыл дойдуга Киинэ сыла биллэриллибитинэн, күөх экраҥҥа киинэ буолан тахсыбыт кинигэлэр долбуурдарын бэлэмнэниллибит. Ону эбээлэр олус кэрэхсээн көрдүлэр. Сэрии кэмнэрин көрдөрөр киинэлэргэ нууччалыы, сахалыы ылламмыт байыаннай ырыалар тустарынан викторина уонна байыаннай ис хоһоонноох өс хоһооннору салҕаан биэрии куонкуруһа ыытылынна.
«Ырыа ыллаан, истиҥник кэпсэтэн, олус сэргэхсийдибит. Куруук маннык ыҥыран түмэллэрэ олус үчүгэй. Арай сылын аайы ахсааммыт аҕыйаан иһэр…«, — диэн эбээлэр санааларын эттилэр.
Кырдьаҕастарга бэйэ илиинэн оҥоһуллубут сибэккини бэлэх ууннулар.
