Ханна олороргуттан тутулуга суох 100 сааска диэри тиийэ олоруохха сөп — сүрүнэ, сөптөөх социальнай-экэнэмиичэскэй усулуобуйа баар уонна хаачыстыбалаах мэдиссиинэнэн хааччыллыы тиийимтиэ буолуохтаах. Бу туһунан Арассыыйаҕа Аан дойдутааҕы доруобуйа тэрилтэтин (ВОЗ) офиһын салайааччыта Батыр Бердыклычев иһитиннэрдэ, суруйда Саха сирэ саайт.
«Уһун үйэлэнии киһи ханна олороруттан буолбакка, бастатан туран, социальнай-экэнэмиичэскэй усулуобуйаттан уонна тулалыыр эйгэттэн, ону тэҥэ хаачыстыбалаах көмөнөн хааччыллыыттан тутулуктаах», — диэн бэлиэтээтэ ВОЗ бэрэстэбиитэлэ РБК араадьыйатыгар биэрбит кэпсэтиитигэр.
Бердыклычев этэринэн, көхтөөх уһун үйэлэнии сүрүн төрүөттэрэ — хамсаныы, сөптөөх аһылык, быраастарга мэлдьи көрдөрүнүү, уйулҕа туругун харыстааһын уонна баай ис хоһоонноох уопсастыбаннай олох. Генетика эмиэ оруоллаах, ол эрээри эспиэр бэлиэтииринэн, чөл олоҕу тутуспакка даҕаны 80 сааска диэри тиийэ олоруохха сөп. Ол эрээри, табахтааһын, арыгыны элбэхтик иһии, хамсаммат буолуу уонна сыалаах, туустаах аһылык кутталы үөскэтэр. Кини этэринэн, бу барыта киһи олоҕун биллэ кылгатар.
