Кырдьаҕастар, оҕо дьиэлэригэр, психоневрологическай диспансердарга, коронавирус пандемиятынан сибээстээн, бииргэ олорорго күһэллибит үлэһиттэргэ эбии төлөбүр көрүллүөҕэ. Ол туһунан бырабыыталыстыба бэрэстэбиитэлэ Ольга Балабкина брифиҥҥэ эттэ, СИА суруйар.
«Коронавирус пандемиятынан сылтаан тустаах үлэни ыыта сылдьар социальнай үлэһиттэргэ федеральнай төлөбүр үбэ өрөспүүбүлүкэҕэ кэллэ. Өрөспүүбүлүкэтээҕи төлөбүрдэр тириэрдиллибиттэрэ. Сотору кэминэн аны федеральнай эбии төлөбүрдэр түһүөхтэрэ», — диэтэ Ольга Балабкина.
Кини инфекционнай стационардарга үлэлиир сотрудниктарга, ол иһигэр суһал көмө үлэһиттэригэр, төлөбүрдэрэ бэриллибитин эттэ. Ыам ыйдааҕы абаанса эмиэ тириэрдиллибит. Манна эбии бэс ыйын бүтүөр диэри бырабыыталыстыба уонна президент төлөбүрдэрэ бэриллиэхтэрэ .
