Саха сиригэр судаарыстыбаннай уонна официальнай тыллары харыстыыр уонна сайыннарар сыалга анаммыт бырагырааманан 300-тэн тахса учебник оҥоһуллар уонна тылы үөрэтэр портал тэриллэр. Ол туһунан үөрэх миниистирэ Ирина Любимова иһитиннэрдэ, суруйар СИА.
2020-2024 сылларга анаммыт тылга бырагыраама үс хос тосхоллоох, ол иһигэр учебнигы бэлэмнээһин.
«2021 сылга улахан өйөбүлү ылан, 300-тэн тахса учебнигы уонна үөрэтэр босуобуйаны бэлэмнээбиппит. Иккис түһүмэх — төрөөбүт тылы үөрэтиигэ анаммыт порталы оҥоруу, сертификациялааһын. Билигин саха тылыгар ылыстыбыт, ити эрээри кэлэр өттүгэр сылын аайы эбэн, толорон иһиэхпит», — диэтэ Ирина Любимова.
«Айар» издательство уонна «ДаниАлмас» хампаанньа ааптардарын көҕүлээһининэн, «Аудиодар Ил Дархана» аудиокинигэ таһаарылынна. Миниистир этэринэн, кинигэни бары оскуолалар ылыахтара.
«Мин санаабар, оҕо кыра сааһыттан кинигэни, остуоруйаны сөбүлээн ааҕар буоллаҕына, үөрэх таһыма үрдүөхтээх», — бэлиэтээтэ Любимова.
