«Күнү көрсүү» диэн саха дьонун биир улахан, өбүгэ саҕаттан баар, айылҕалыын ыкса ситимниир сиэр-туом буолар. Бу тэрээһин Күҥҥэ сүгүрүйүүнү, айылҕа тылллыытын уонна үтүө кэскили түстээһини кэрэһилиир. Дьокуускайга бэс ыйын 21 күнэ буолар түүнүгэр Ытык сир пааркатыгар дьон тоҕуоруһа мустан, алгыстаннылар, арчыланнылар.
Күнү көрсүү сиэригэр-туомугар Анна Захарова сырытта уонна саха норуотун култууратын биир ураты эйгэтин хаартыскаҕа түһэрдэ, видеоҕа уһулла.
Саха култууратыгар Күн олус улахан суолталаах, кини сылааһыттан уонна уотуттан дьон олоҕо, сүөһү-ас, хаһаайыстыба табыллыыта тутулуктаах. «Күнү көрсүү» кэмигэр дьон мустан, айылҕа күүстэригэр махтаналлар.
Ытык сир пааркатыгар түүн 00:30 чаастан саҕалаан, Күн тахсарын көрсө дьон-аймах муhунна. Бэлиэтээн эттэххэ, пааркаҕа аан бастакытын ыытылынна. Икки чаастан алгысчыт Күҥҥэ, Үрдүк Айыыларга сүгүрүйэн, Орто Дойду дьоно-сэргэтэ бары доруобай, дьоллоох, олох-дьаhах үтүө буоллун диэн тускуйда. 02:35 чааска күн сылаамньыйа күлүмүрдээн, саҕахтан өрө көттө.
Зинаида Григорьева хаартыскаҕа түһэрбитин ыытта уонна санаатын үллэһиннэ:
— Күнтэн күүс-уох ылынаары, ыраастанаары барбыппыт. Элбэх дьон алгыстана кэлбитэ.
Яна Егорова:
— Дьүөгэбинээн алгыстанаары күн көрсүүтүгэр сырыттыбыт. Сахабыт түгэстэрэ олохпутугар наhаа да суолталаах диэн сыл ахсын бэлиэтии көрөбүн.
Алгыс сиэрин кэнниттэн дьон-аймах илии тутуhан, алтыhан биир оhуохай тэтимигэр уйдардылар.
Ааптар: Дайаана Апросимова
