СӨ Бырабыыталыстыбатын бэрэссэдээтэлэ Андрей Тарасенко илин эҥэргэ оттооһуҥҥа туох кыһалҕалар баалларын билистэ. Улуус баһылыктара этиилэрин киллэрдилэр, диэн суруйда «Саҥа олох» хаһыат.
Сүөһү-сылгы аһылыгын хааччыйыыга туһуламмыт мунньах Чурапчыга ыытылынна. Мунньахха тыа хаһаайыстыбатын миниистирэ Александр Атласов, Чурапчы улууһун баһылыга Степан Саргыдаев, ыаллыы сытар улуустар баһылыктара уо.д.а. кыттыыны ыллылар.
Андрей Тарасенко оттооһуҥҥа чопчу туох кыһалҕалары көрсөҕүтүй, туох кыаллыбат боппуруостар баалларый диэн мунньаҕы саҕалаата.
Чурапчы улууһун баһылыга Степан Саргыдаев быйыл улууска былаанынан 42503 туонна оттонуохтааҕын мобильнай биригээдэлэри холбоон, 36540 туонната туоларын сабаҕалыыр. Кини Андрей Тарасенкоҕа 2 сүрүн боппуруоһу туруорда. Бастакытынан, улууска быһыттар быстар мөлтөх туруктаммыттарынан, саҥардан оҥорууга уонна капитальнай өрөмүөҥҥэ үбү-харчыны булууга көмөлөһөрүгэр эттэ. Кураан дьылларга ууну хаһаанар табыллыбакка, сири кыайан нүөлсүтэр, өлгөм үүнүүнү ылар сатамматын быһаарда. Иккиһинэн, мобильнай биригээдэлэр оросхуоттарын сорох чааһын толуйалларыгар көрдөстө.
Таатта улууһун баһылыга Михаил Соров уонна Мэҥэ Хаҥалас улууһун баһылыга Дмитрий Тихонов сүөһү иитиитигэр көрүллэр субсидиялары оройуон дьаһалтатын боломуочуйатыгар биэрэллэригэр эттилэр. Дьаһалталар бэйэлэрин тустаах балаһыанньаларыттан көрөн, бу субсидиялары ынах төбөтүгэр биэрэллэрин дуу, биитэр үүт харчытын үрдэтиигэ көрөллөрүн дуу бэйэлэрэ быһаараллара ордугун эттилэр.
Андрей Тарасенко түмүккэ нэһилиэктэринэн быһыттар хайдах балаһыанньалаахтарын тустаах докумуоннары оҥорон киллэрэллэригэр эттэ. Тыа хаһаайстыбатын министиэристибэтигэр кураан дьылларга биһиги тыйыс усулуобуйабытыгар эппиэттиир сиэмэнэн ыһыллар оту
үөрэтэн көрөргө соруйда. Ол эбэтэр хас да сиргэ араас-араас сиэмэни ыһан көрөн, үчүгэйин талалларыгар ыйда. Маны таһынан ыам түспүт кэмигэр субсидияланан кэлэр бороһуок үүтүнэн бэйэ бородууксуйатын оҥорон таһаарар наадалааҕын тоһоҕолоото.
#саҥаолох
