21 От ыйа 21.07
  • 16°
  • $ 88,02
  • 96,04

От ыйын 1 күнүттэн хамнас алын кээмэйэ үрдүүр

12:14, 17 июня 2016
Текст:
Читайте нас на
Яндекс Новости
ЯДВ

От ыйын 1 күнүттэн Саха сиригэр хамнас алын кээмэйэ үрдээн 18 824 солк. тэҥнэһиэҕэ. Саха Өрөспүүбүлүкэтин бырабыыталыстыбатын, идэлээх сойуус федерациятын уонна үлэни биэрээччилэр холбоһуктарын икки ардыларыгар түһэрсиллибит сөбүлэһии чэрчитинэн хамнас алын кээмэйэ эбилиэҕэ.


Идэлээх сойуус федерациятын пресс-сулууспатыттан СИА-ҕа эппиттэринэн, социальнай-үлэ сыһыаннаһыыларын сүрүннүүр үс өрүттээх хамыыһыйа мунньаҕар бу сөбүлэһиигэ илии баттаммыт. Докумуоҥҥа бырабыыталыстыба бэрэссэдээтэлэ Галина Данчикова, идэлээх сойуус федерациятын салайааччыта Николай Дегтярев уонна Саха сиригэр үлэни биэрээччилэр холбоһуктарын бэрэстэбиитэлэ, «Анаабыр алмаастара» АО генеральнай дириэктэрэ Павел Маринычев илии баттаатылар.

Хамнас алын кээмэйэ урукку өттүгэр 15 390 солк. этэ. От ыйын 1 күнүнээҕи үрдээһин 9,3% тэҥнэһиэҕэ.

2016 сыл от ыйын 1 күнүттэн Россияҕа үлэ төлөбүрүн алын кээмэйэ үрдээн 7 500 солк. буолуоҕа.

СӨ Үлэ, социальнай сайдыы миниистирэ Александр Дружинин эппитинэн, кэлиҥҥи биэс сылга хамнас алын кээмэйэ 6 614 солк. 16 824 солк диэри үрдээн 2,5 төгүл улааппыт.

«Россия 85 субъегыттан 63-гэр хамнас алын кээмэйэ үрдүүр. Итинтэн 21 региоҥҥа үрдээһин чуолаан экономика секторын бюджеты таһынааҕы тэрилтэлэригэр киирбит. Оттон бюджет эйгэтин үлэһиттэригэр федеральнай хамнас алын кээмэйэ дьайар. РФ 21 субъегар хамнас алын кээмэйэ аһаан-таҥнан олоруу алын кээмэйигэр диэри тиэрдиллибит. Холобур, Уһук Илиннээҕи федеральнай уокурукка хамнас алын кээмэйэ аһаан-таҥнан олоруу алын таһымын саҕа буолбут», — диир миниистир.

Идэлээх сойуус федерациятын салайааччыта Николай Дегтярев социальнай партнердарыгар – өрөспүүбүлүкэ бырабыыталыстыбатыгар уонна үлэни биэрээччилэр холбоһуктарыгар хамнас алын кээмэйин үрдэтиигэ туһуламмыт хардарыта дьайсыылаах, былааннаммыт үлэ иһин махтанна.

Бырабыыталыстыба бэрэссэдээтэлэ Галина Данчикова үп министиэристибэтэ кэмигэр хос ааҕыыны оҥороругар сорудахтаата.

Саха сиригэр хамнас алын кээмэйэ федеральнай бюджеттан үбүлэнэр тэрилтэлэртэн ураты өрөспүүбүлүкэ сиригэр-уотугар үлэлиир тэрилтэлэргэ барыларыгар үөскэтиллэр.

Следите за самым важным и интересным в Telegram-канале и WhatsApp-группе ЯСИА