Бырабыыталыстыба түмүктүүр отчуотун кэмигэр бэрэссэдээтэл солбуйааччыта Сергей Местников төрөөбүт төрүт тылга болҕомто ууруута өссө күүһүрэрин иһитиннэрдэ. Бу Ил Дархан Айсен Николаев сорудаҕа.
Төрөөбүт тылга болҕомто ууруутугар биир төрүт соругунан саҥа тутуллар оскуолаларга сахалыы уонна аҕыйах ахсааннаах төрүт норуоттар тылларынан үөрэтэр кылаастар элбиэхтэрэ. «Билигин региоҥҥа тутуллар оскуолаларга, бастатан туран, Дьокуускайга, сахалыы тылынан уонна аҕыйах ахсааннаах норуоттар тылларынан үөрэтэр кылаастар элбиэхтэрэ», — диэтэ Сергей Местников.
Онно анаан үөрэх тэрилтэлэригэр усулуобуйаны тэрийиигэ болҕомто ууруллуохтаах. Бу үүнэр көлүөнэ бэйэтин тылынан сатаан саҥарар, быһаарсар уонна сайдар кыаҕын түстүөхтээх. Итиэннэ дьиэ кэргэн сыаннастара, төрөппүттэр тылга сыһыаннара эмиэ улахан оруоллааҕын эттэ.
