Мэҥэ Хаҥаласка аһыҥа элбээн, хаһаайыстыбалар оту былдьаһан, көрдөрө мэлитэр үөнү кытта сорунуулаах охсуһууга туруммуттара. Доллу нэһилиэгин сис хаһаайыстыбата ‒ «Тумул» кэпэрэтиип быйыл аһыҥаны эмтээһини хаһааҥҥытааҕар да киэҥ сиргэ ыытта.
Кэпэрэтиип салайааччыта Таисия Десяткина чуолкайдаабытынан, эмтэммит ходуһаларын уопсай иэнэ 502 гектар буолла. Нэдиэлэ курдук түүнүн үлэлээннэр, аһыҥаны эмтээһин үлэтин бэс ыйын 27 күнүгэр түмүктээбиттэр. Аһыҥа түүн окко олорор кэмигэр эмтииллэрин ордороллор. Ыстарыыны аһыҥа ситэн эрдэҕинэ ыыталлар. Эмтэниллэр ходуһалар күрүөлэрин барытын өрөмүөннээн, сүөһү киирбэт гына оҥорон эрэ баран, ыстарыыны ыыталлар. Ый аҥаара ол ходуһаҕа сүөһү, сылгы киириэ суохтаах.
Аһыҥаны хаптатыыга хаһаайыстыба туруу үлэһиттэрэ ‒ механизатор Спиридон Десяткин уонна уу таһар массыына суоппара Владимир Десяткин сырыттылар. Киэһэ 6 чаастан хоҥнон, сарсыарда 5-6 диэки төннөллөр. Барыта биэс ходуһаны эмтээбиттэр: 245 гектардаах Эбэ ходуһатын, Кыһыҥҥы Арыылааҕы (145 гектардаах), Улахан Сыхханы (36), Барабыыты (20) уонна 56 гектар арендаласпыт сирдэрин. Итини таһынан, 60-ча гектар ыаллар ходуһаларын эмтээһин өҥөтүн оҥорбуттар. 70 киилэ эми Тумул, Төҥүлү, Тарат, Балыктаах сэлиэнньэлэрин олохтоохторугар атыылаабыттар.
Аһыҥаны эмтииргэ хас да сыллааҕыта ылбыт «Казаньсельмаш» хампаанньа оҥорбут ОН-600 «Барсик» ыстарарын туһаналлар. 600 лиитэрэлээх иһитин уута 5-6 гектарга тиийэр. Ыстарарын уһуна 12 миэтэрэ далааһыннаах. Эмтииргэ «Союзагрохим» ХЭУо «Агрусхим» хампаанньалыын оҥорор «Самум» инсектицидин ыстараллар. Бу дьаат аһыҥа иһигэр, оһоҕоһугар киирэн өлөрөр. Эми саас өрүс суола сабыллыан иннинэ, Дьокууускайтан «Россельцентр» Саха сиринээҕи салаатыттан атыылаһан хааччыммыттар уонна урукку эмп ордуга баарын туһаммыттар диэн, https://www.instagram.com/p/CQu8wnUMzyg/?utm_medium=share_sheet суруйар.
