29 Кулун тутар 29.03
  • -11°
  • $ 92,26
  • 99,71

I Күүлэккэ төрөөбүт «Үйэ оҕолоругар» олохтоох бүддьүөттэн эбии 10 тыһ солк ананыаҕа

Читайте нас на
Яндекс Новости
ЯДВ

Бүлүү улууһун I Күүлэт нэһилиэгэр 2022 сылга төрөөбүт оҕолор 10 тыһ солк ылыахтара. Быһаарыыны олохтоох  дьаһалта Саха АССР төрүттэммитэ 100 сыллаах үбүлүөйүгэр уонна Ийэ сылыгар анаата.

Олунньу 1 күнүгэр тэриллибит I Күүлэт нэһилиэгин Сэбиэтин сессиятыгар дьокутааттар олохтоох дьаһалта баһылыга Айал Новиков быйыл I Күүлэккэ төрөөбүт оҕолорго 10 тыһ солк төлөбүрү оҥорорго ыҥырыытын өйөөтүлэр. Дьаһал Саха Өрөспүүбүлүкэтин Ил Дархана Айсен Николаев 2022 сылы Ийэ сылынан биллэрбитигэр уонна Саха АССР төрүттэмитэ 100 сыллаах үбүлүөйүгэр анаммыта этилиннэ. Сессияҕа дьокутааттар төлөбүр бүддьүөттэн көрүллэригэр быһаарыы ылыннылар.

Бүлүү улууһун өрүс уҥуор сытар 8 нэһилиэгиттэн дьонун ахсаанынан саамай элбэҕинэн I Күүлэт буолар. Кэрэ айылҕалаах сиргэ 860 киһи уутуйан олорор, саха сиэринэн ынах сүөһү, сылгы итиитинэн дьарыктанар. «I Күүлэт» тыа хаһаайыстыбатын оҥорон таһаарар кэпэрэтиибэ элбэх сүөһүнү, сылгыны тутар, сыллата киэҥ нэлэмэн ходуһаларыгар үгүөрүтүк оттуур.

I Күүлэт нэһилиэнньэтин ахсаана сыллата эбиллэ турар, эдэр ыччат төрөөбүт дойдутугар үлэлии-хамсыы хаалар, үөрэх кэнниттэн төннөн кэлэр. Оҕо уһуйааныгар 70 кырачаан үөрэ-көтө сылдьар, онтон оскуолаҕа 150 оҕо билии ылар. Улууска тыа сиригэр I Күүлэккэ саамай элбэх — сылын аайы 14-16 оҕо төрүүр.

Нэһилиэк дьаһалтатын баһылыга Айал Новиков 20 сыл уһуннук үлэлээбит уопуттаах, билиилээх-көрүүлээх салайааччынан буолар. Улуус хоту баһыгар чиэски сиргэ сытар бөһүөлэк дьиэлэригэр гаас ситимэ тардыллыытыгар, тыа сиригэр суох үчүгэй Култуура дьиэтин, 150 миэстэлээх оскуола, 50 миэстэлээх оҕо уһуйаанын, Албан аат, Ийэ искибиэрдэрин тутууларыгар уо.д.а. үтүөтэ-өҥөтө элбэх.

Ааспыт сыл ахсынньы ый ортотугар Ил Дархан Айсен Николаев Ил Түмэҥҥэ туһаайан этиитигэр 2022 сыл Ийэ сылынан биллэриллэрин уонна Саха АССР төрүттэмитэ 100 сылыгар төрөөбүт оҕолорго 100 тыһ солк төлөнүөҕүн эппитин Саха сирин олохтоохторо сэҥээрэ истибиттэрэ. 2022 сылга төрөөбүт оҕолорго анал «Үйэ оҕолоро» тус сыаллаах төлөбүр оҥоһуллар.

Олунньу 1 күнүгэр «Саха» НКИХ киэһээҥи биэриитигэр Ил Дархан Айсен Николаев тохсунньу ыйга Саха сирин үрдүнэн 823 оҕо төрөөбүтүн иһитиннэрдэ.

Ити курдук, быйыл I Күүлэккэ төрөөбүт «Үйэ оҕолоругар» өрөспүүбүлүкэттэн 100 тыһ солк нэһилиэктэн эбии 10 тыһ солк ананыаҕа. Ил Дархан Айсен Николаев быһаарыытын тыа сиригэр өйөөһүн Бүлүү улууһугар, Саха сиригэр биир бастакынан I Күүлэккэ тэрилиннэ.

Ааптар: Николай Куприянов, Бүлүү улууһа

Следите за самым важным и интересным в Telegram-канале и WhatsApp-группе ЯСИА