Саха сирин сүрүн үрдүк үөрэҕин кыһата – М.К. Аммосов аатынан Хотугулуу-Илиҥҥи федеральнай университет (ХИФУ) – саҥа үөрэх дьылын көрсө улахан суолталаах сонуннаах. Быйыл, 2026 сылга, университет уопсайа 4120 бүддьүөт миэстэни көрдө, бу ааспыт сыллааҕар элбэх.
ХИФУ дьаһала Саха сирин оҕолоругар уонна эдэр ыччатыгар улахан кыаҕы арыйар. Бүддьүөт миэстэтин ахсаана эбиллиитэ үөрэххэ киирии хаачыстыбатын үрдэтэр.
Бэс ыйын 20 күнүттэн докумуон тутуута саҕаланна. Абитуриент ХИФУ иһинэн ыытыллар айар дьоҕур эбэтэр уопсай үөрэх биридимиэттэригэр киирэр тургутуулары ааһар буоллаҕына, докумуонун 2026 сыл от ыйын 19 күнүгэр диэри туттарыахтаах. Оттон үөрэххэ киирии БКЭ түмүктэринэн эрэ оҥоһуллар буоллаҕына, докумуоннары туттарыы 2026 сыл от ыйын 25 күнүгэр түмүктэнэр.
Бакалавриакка уонна специалитекка — 3765, орто профессиональнай үөрэххэ — 355 бүддьүөт миэстэтэ көрүлүннэ. Билиҥҥи туругунан 5000 тахса сайабылыанньа киирбит. Ол туһунан Киин хамыыһыйа бэрэссэдээтэлэ Петр Кычкин кэпсээтэ:
— Биһиэхэ билигин 5000-тан тахса сайабылыанньа киирдэ. Ол аата 1500-тэн тахса абитуриент докумуонун биэрдэ. Үрдүк үөрэххэ хас биирдии абитуриент хас да хайысхаҕа докумуонун биэриэн сөп. Биир сайабылыанньанан муҥутаан 5 хайысханы талыан сөп. Оттон орто үөрэххэ, магистратураҕа хааччахтааһын суох.
Саха Өрөспүүбүлүкэтин үрдүк үөрэх тэрилтэлэригэр киирии хампаанньата устудьуоннарга табыгастаах усулуобуйаны тэрийдэ. Билигин абитуриеннар докумуоннарын Судаарыстыбаннай Өҥө портал нөҥүө биэриэхтэрин сөп. Бу биллэн турар, бириэмэни харыстыыр. Ону таһынан, сайаапкалары биэриини судургутатар «биир түннүк» систиэмэтэ үлэлиир.
Абитуриеннарга табыгастаах буоллун диэн, докумуоннары биэриигэ көмөлөһөр оператордар сүбэлэрэ тэрилиннэ. Кинилэр хас биирдии түһүмэххэ өйөбүлү оҥороллор, Судаарыстыбаннай Өҥө систиэмэтин нөҥүө докумуоннары биэриигэ тиийэ.
Куонкурус түмүктэрэ от ыйын 27 күнүгэр биллиэхтэрэ. Үөрэххэ киирии атырдьах ыйын 3 күнүттэн саҕаланар, ол эрэн бастакынан доруобуйаларынан хааччахтаахтар, тулаайахтар уонна олимпиада кыайыылаахтара — миэстэлэри ылыахтара. Сүрүн түһүмэҕэ атырдьах ыйын 7 күнүгэр былааннанар.
Быйыл квоталары түҥэтиигэ уларыйыылар киирбиттэрэ бэлиэтэнэр. Ону сэргэ, төлөбүрдээх хайысхаларга миэстэ ахсаанын хааччахтара олохтоммуттара.
Ааптар: Дайаана Апросимова
