Үлэ килбиэнэ уордьан III степеннээх кавалера, «Чолбон Сулус» уордьан кавалера, Мэҥэ Хаҥалас улууһун бочуоттаах олохтооҕо, өрөспүүбүлүкэ тыатын хаһаайыстыбатын үтүөлээх үлэһитэ, ХХ үйэ ыанньыксыт-рекордсмена Павел Петрович Шарин 65 сааһын туолла. Киниэхэ «Бочуоттаах настаабынньык» бэлиэ туттарылынна.
Дойдуга пандемия кыһалҕатынан, үлэ киһитэ Павел Петрович үбүлүөйүн дьиэ кэргэнин иһигэр бэлиэтиир. Тыа хаһаайыстыбатын миниистирэ Александр Атласов бастыҥ ыанньыксыты үөрүүлээх күнүнэн эҕэрдэлээтэ.
«Эн — дьиҥнээх үлэ киһитэҕин, норуотуҥ туһугар туруулаһаҕын, талан ылбыт идэҕэр бэриниилээххин, бэйэҥ холобургунан үөрэтэҕин. Эн дьоруойдуу үгүс сыраҕын биэрбит үлэҥ, уопутуҥ өссө ситиһиилээх буоларыгар эрэллээхпин. Биһиги сорукпут – эн оҥорбут дьыалаҕын харыстааһын, сыаналааһын уонна үрдүктүк тутуу уонна салгыы кыайыылары ситиһии. Биһиги эйигинэн киэн туттабыт, эн тыа хаһаайыстыбатын салаатыгар киллэрбит кылааккынан», — диэтэ Атласов.
Александр Атласов министиэристибэ аатыттан үбүлүөйдээҕи эҕэрдэлээтэ уонна «Бочуоттаах настаабынньык» бэлиэни туттарда.
Павел Шарин 40-тан тахса сылын Саха сирин тыатын хаһаайыстыбата туруктаах уонна сайдыылаах буоларыгар анаата. 70-с сыллардаахха оскуоланы бүтэрээччилэр производствоҕа тахсар ыҥырыыларын өйөөн, кини Дьоруой Попов аатынан «Тайҕа» ыччат пиэрмэтин ыанньыксыта буолбута.
1984 сыллаахха өрөспүүбүлүкэ рекордун олохтообута — биир ынахтан 5711 киилэ үүтү ыабыта, валовай ыама 109 тн тэҥнэспитэ. 1985 с. кини көрдөрүүтүн тупсарбыта — биир ынахтан аны 6072 киилэ үүтү ылбыта. Социалистическай күрэхтэһии кыайыылааҕынан кинилэр пиэримэлэрэ буолара.
Өрөспүүбүлүкэ, дойду үлэ киһитин сыаналаабыта: САССР Үрдүкү Сэбиэтин XI ыҥырыытын депутатынан талыллыбыта. ССРС ВДНХ икки кыһыл көмүс уонна боруонса мэтээллэрин хаһаайына, диэн суруйда тыа хаһаайыстыбатын министиэристибэтин пресс-сулууспата.
