Горнай улууһугар үлэлиир «Сайдыы суола» уопсастыбаннай тэрилтэ уонна Людмила Лукина аатынан Эбии үөрэхтээһин киинэ «Оҕолор сахалыы ойуулуктары оҥороллор» диэн бырайыагы көҕүлээн үлэлэрин саҕалаатылар.
Бырайыак Ил Дархан гранын куонкуруһун кыайыылааҕа буолан үбүнэн-харчынан өйөннө, сүрүн сыалынан соругунан учууталлары, иитээччилэри, уһуйааччылары уонна оҕолору сахалыы ойуулуктары айан, оҥорон, таҥан таһаарарга үөрэтии, ылбыт билиини, сатабылы туһанан, сахалыы ойуулуктары оҥорууну көҕүлээһин, өрөспүүбүлүкэ таһымнаах бэстибээл тэрийэн оҕолор бастакы айымньыларын сыаналааһын, бастыҥ үлэлэри куйаар ситимигэр таһааран сахалыы контены байытыы, «Саха» көрдөрөр иһитиннэрэр хампаанньа «Чохоон» оҕо сахалыы ханаалыгар киллэрии буолар.
Фото: телеграм-канал "Сила труда"
Ойуулуктары оҥорууга идэ таһымын үрдэтэр «Технология создания анимационных фильмов» кууруһун С.Ф.Гоголев аатынан Дьокуускайдааҕы педагогическай колледж уһуйааччыта Артур Федоров, үксүн быраактыкаҕа олоҕуран, олус өйдөнүмтүө гына ыытта. Киниэхэ колледж волонтер устудьуоннара көмөлөстүлэр. Кууруска Горнай, Бүлүү, Мэҥэ Хаҥалас, Амма, Уус Алдан, Дьокуускай куорат 20 учууталлара, иитээччилэрэ, уһуйааччылара үөрэннилэр.
22 оҕо кыттыылаах «Лаборатория анимационных фильмов» маастар кылааһы волонтердар, колледж иккис кууруһун устудьуоннара Григорьева Алина, Заровняева Алина, Иванова Евдокия Бэрдьигэстээххэ Эбии үөрэхтээһин киинигэр кэлэн үөрэттилэр. Оҕолор Krita, Audacity, Movavi сыһыарыылар көмөлөрүнэн ойуулук оҥорууга бастакы хардыыларын оҥордулар, билии-көрүү эбинэн, астынан бардылар.
«Сайдыы суола» уопсастыбаннай тэрилтэ аатыттан, С.Ф. Гоголев аатынан Дьокуускайдааҕы педколледж дириэктэригэр Изольда Николаеваҕа, эбии үөрэхтээһини тэрийэр отдел салайааччыта Виктория Габышеваҕа, уһуйааччы Артур Федоровка уонна устудьуоннарга махталбытын тириэрдэбит.
Ил Дархан гранын көмөтүнэн мультипликация эйгэтигэр үөрэнэн, билиини, сатабылы ылбыт уһуйааччылар, иитээччилэр, оҕолор сахалыы ойуулуктары оҥорууга ылсыахтара диэн эрэнэбит, муус устарга ыытыллар бэстибээлгэ күүтэбит.
Ааптар: Александра Колесова, silatrudagorny телеграм-ханаал
