26 От ыйа 26.07
  • 17°
  • $ 85,41
  • 93,17

Дойду хааһыната 31,7 мөл. солк. туохха көрдө?

15:25, 03 февраля 2017
Текст:
Читайте нас на
Яндекс Новости
ЯДВ

Саха сирэ былырыын оҕону эбии үөрэхтээһиҥҥэ персонифицированнай үбүлээһин тус сыаллаах федеральнай бырагырааманы сүүйбүтэ. Манан сибээстээн, дойду хааһынатыттан 37,7 мөл. солк. көрүллүбүтэ. Бу туһунан edersaas.ru ааҕыҥ.


Санатан эттэххэ, Россия үрдүнэн ити эспэримиэн маҥнайгынан Саха сиригэр киирбитэ. Биһигини сэргэ өссө алта регион хабыллыбыта. Эбии үөрэхтээһин сылынан итиэннэ пилотнай эспэримиэнинэн сибээстээн, Эбии үөрэхтээһини уонна оҕо тэрилтэтин сайыннарар киин үлүскэн үлэни ыытта. Көрүллүбүт үп баһыйар улахан аҥаара (21,3 мөл. солк.) эбии үөрэхтээһин 15 тэрилтэтин үөрэтэр-техническэй тэрилинэн хааччыйыыга барбыт. Онтон хаалбыт үбү атын эбии үөрэхтээһин тэрилтэлэрин сайыннарыыга, үлэһиттэр идэлэрин таһымын үрдэтиигэ ыыппыттар. Пилотнай эспэримиэн киирэн, быйыл көрүллүбүт үбүнэн оҕолор 6 муниципальнай, 3 судаарыстыбаннайа суох эбии үөрэхтээһин тэрилтэлэрэ ыытар дьарыктарыгар сылдьар кыахтаммыттара.

Маннык холонон, боруобалаан көрүү ситиһиилээҕин көрдөрөн, быйыл бырайыагы салгыы үлэлэтэргэ анаан, эбии үөрэхтээһиҥҥэ дойду хааһынатыттан 31,7 мөл. солк. көрөр буоллулар. Итинник субсидияны Россия 9 региона туһаныаҕа. Уопсай суума 205,2 мөл. солк. тэҥнэһэр.

Манна биири бэлиэтиир тоҕоостоох, ол курдук, урукку сылларга хааһына харчыта судаарыстыбаннай эрэ тэрилтэлэргэ барыахтаах диэн өйдөбүл баара. Билигин ити төрдүттэн уларыйан, оҕо чахчы хаачыстыбалаах уонна туһалаах дьарыкка сырыттын диэн, чааһынай тэрилтэлэри эмиэ өйүүр буоллулар. Ол эбэтэр, ким ордук  хаачыстыбалаах өҥөнү оҥорор — ол судаарыстыба көрөр харчытынан туһанар кыахтаах. Маныаха харчы ханнык тэрилтэҕэ барарын — чааһынайга дуу, судаарыстыбаннайга дуу, оҕо төрөппүтү кытта бэйэтэ быһаарар. Эбии үөрэхтээһин тэрилтэтин бырагыраамата сертификациялаах буоллаҕына, оҕо онтон сөбүлээбит дьарыгар сылдьар. Оччотугар киниэхэ бэриллибит сэртипикээтигэр баар харчыта өҥөнү оҥорор тэрилтэҕэ түһэр. Оҕо ол дьарыгы сөбүлээбэт түгэнигэр, атын ханнык баҕарар сертификациялаах бырагыраамалаах тэрилтэҕэ көһүөн сөп. Онон, оҕону сэҥээрдэр, хаачыстыбалаах эрэ тэрилтэлэр дойду хааһынатын харчытыттан тииһинэр кыахтаахтар.

Следите за самым важным и интересным в Telegram-канале и WhatsApp-группе ЯСИА
Тутаах тыллар