Дьааңы куоратыгар тымныы чинчийиллэн бэлиэтэмитэ 150 сылыгар аналлаах бэлиэ тэрээһин буолан ааста. Бу Саха сирин хотугулуу-илиңңи өттүн чинчийбит Гергард Дюдвигович Майдель аатын кытта ситимнээх Нуучча геграфическэй уопсастыбатын экспэдииссийэтин историятын биир чаҕылхай бэлиэтэ.
1885 сыл тохсунньу 15 күнүгэр политсыылыный, математика наукатын кандидата, политическай сыылынай Сергей Ковалик Дьааңы куоратыгар Цельсиянан — 67,8 кыраадыс тымныыны бэлиэтээбитэ. Мантан ыла Дьааңы куората саамай тымныы сиринэн билиниллибитэ.
Дьааңы улуһун баһылыгын солбуйааччы М.И.Осипов 150 сылга анаммыт мемориальнай дуосканы эҕэрдэлээн туран арыйда. РФ Бырабыыталыстыбатыгар СӨ бастайааннай бэрэстэбиитэлэ Андрей Сандаминович Федотов уонна М.И.Губкин аатынан нефть уонна газ универститетын преподавателэ Константин Констатинович Ильковскай биир дойдулаахтарын видео ситимин нөңүө эҕэрдэлээтилэр. Улуус депутаттарын Сэбиэтин бэрэссэдээтэлэ Е.В. Ноговицына, куорат тэрилтэлэрэ, баһылыга Е.А.Потапов Анатолий Валерьевич Перфильев салайааччылаах
метео-ыстаансыйа кэлэктиибин эҕэрдэлээтилэр.
«Тымныы чыпчаала» кыраайы үөрэтэр мусуой научнай үлэһитэ Наталья Гарильевна Лаптева сырдатыытыгар 1898 с.Иван Худяков «ХИА» диэн быһыллан оңоһуллубут инициаллаах сэргэни В.П.Ноговицын аҕалан бэлэхтээбитин уонна Дьокуускайдааҕы метеорологическай сулууспа холбоһуктаах саламтатын архыыбын буондатыттан 1960 — 2000 сылларга диэри кээмэйдэммит бэлиэтээһиннэрдээх сурунаал куопуйата мусуой баай буондатын хаңатарын туһунан кэпсээтэ.
Метео-ыстаансыйа начальнига А.В.Перфильев урут үлэлээн ааспыт үөлээннээхтэрэ хаалларбыт уопуттара кэлэктиип эдэр көлүөнэтигэр тирэх буолаллалларын ахтан ааста, айылҕа бары көстүүтэ, уу, сир барыта бииргэ тутуллан чинчийиллэрин эттэ.
Хоту дойду олоҕо, бары эйгэтэ метеорологияны кытта ситимнээҕин тоһоҕолоотулар, сырдык фойеҕа туруоруллубут Дьааңы метеорологиятын устуоруйатын кэпсиир быыстапка тула куорат олохтоохторо, ыалдьыттара тоҕуорустулар.
Дьааңы өрүс кытылын өңөйөн турар, урукку кэмнэри бу баардыы санатар уларыйбат тутуулардаах кыракый метео-ыстаансыйаҕа Арассыыйа араас муннуктарыттан элбэх киһи кэлэн үлэлээбитэ. Бүгүн үлэлии сылдьар аэролог, метеоролог нуучча, саха эр санаалаах кыргыттара, уолаттара айылҕа көстүүлэрин, тулалыыр эйгэни кытта күн ахсын алтыһаллар.
Ааптар: Раиса ЧИРИКОВА
