Кулун тутар 13 күнүттэн Ленскэй оройуонугар быраастар көһө сылдьар биригээдэлэрэ үлэлиир. Исписэлиистэргэ ыраах сытар Пеледуй, Витим, Ньүүйэ уонна Толон нэһилиэктэртэн 627 киһи сырытта. Билигин быраастар дьону Ленскэйгэ көрөллөр, манна кулун тутар 24 күнүгэр диэри үлэлиэхтэрэ.
«Маннык сыыппаралары быраастар сарсыардаттан киэһээҥҥэ диэри дьаныардаахтык үлэлээн ситистилэр. Баҕалаахтары барыларын көрөөрү суббуота күн кытары үлэлээтилэр»,-диэн Саха сиринээҕи Доруобуйа харыстабылын пресс-сулууспатыгар бэлиэтээтилэр.
Биригээдэ састаабыгар Дьокуускайтан кардиолог, отаринголог, дерматолог уонна онколог быраастар үлэлээтилэр. Ленскэйтэн кинилэргэ фтизиатр уонна невролог холбоспуттара.
Бүтэһик дааннайынан, Ленскэйгэ быраастар 109 киһини көрдүлэр.
Санатан эттэххэ, «Доруобуйа харыстабыла» нацбырайыак бастакы звеноларын модернизациялааһын бырагырааматынан Ленскэй улууһун киин балыыһата КамАЗ ылла. Оройуоннааҕы медиктэр тиһигин быспакка дэриэбинэлэринэн сылдьан профилактическай үлэни ыыталлар уонна вакцинациялыыллар.
