19 От ыйа 19.07
  • 15°
  • $ 87,88
  • 96,1

Бөтүҥ агрооскуолатыгар уопут оҥорор, үүнээйини чинчийэн үөрэтэр кылаас аһылынна

Читайте нас на
Яндекс Новости
ЯДВ

Амма улууһун Бөтүҥ нэһилиэгэр Н.Е.Иванов аатынан Бөтүҥ орто агрохайысхалаах оскуолатыгар үөрүүлээх күн үүннэ. Амма улууһугар Дьиэ кэргэн экономикатын сылынан, Социалистическай Үлэ Дьоруойа А.М.Васильева 105 сааһынан, ону тэҥэ Социалистическай Үлэ Дьоруойа П.И.Яковлев 100 сааһыгар анаан «Оҕону үлэнэн иитии» диэн девиһынан салайтаран, оскуола иһинэн саҥа опытнай-экспериментальнай кылаас аһылынна.


Бөтүҥ орто оскуолатын экспериментальнай кылааһыгар саҥа тутуллубут 54 кв м иэннээх улахан теплица үлэҕэ киирдэ. Үөрэнээччилэр мантан ыла элбэххэ үөрэниэхтэрэ, үлэлиэхтэрэ. Бу үөрүүлээх түгэн куйаар ситимин нөҥүө элбэх оскуоланы түмэ тардан ыытылынна. Кэлбит үлэһиттэри саха тылын учуутала Анастасия Лазарева сахалыы сиэринэн-туомунан, арыылаах алаадьынан айах тутта. Үөрүүлээх чааска оскуола директора Акулина Иванова эҕэрдэ тылын этэн туран, экспериментальнай кылаас хаһаайкаларыгар Туяра Рожинаҕа уонна Ида Назароваҕа үөрүүлээх быһыыга-майгыга кылаас күлүүһүн, итиэннэ улуус баһылыга Николай Архипов аатыттан «Капельный полив» шланга комплегын туттарда.

Опыттаах оҕуруотчут, технология учуутала Туяра Петровна, биология учуутала, производственнай үөрэхтээһин маастара Ида Иннокентьевна, директоры хаһаайыстыбаннай чааска солбуйааччы, кэскиллээх үлэһит Егор Онуфриев, прораб, оскуола эдэр эрэллээх үлэһитэ Константин Слепцов экспериментальнай кылаас үөрүүлээх аһыллыытын лиэнтэтин быстылар.

Олохтоох дьаһалта аатыттан баһылык солбуйааччыта Алексей Стручков эҕэрдэлээн туран, теплица оҥоһуутугар элбэх сыраларын биэрэн үлэлээбит оскуола көхтөөх үлэһиттэригэр, история учууталыгар Андрей Гоголевка, прораб Константин Слепцовка уонна Терентий Семеновка Махтал суруктары, итиэннэ өйдөбүнньүк бэлэхтэри, оҕолор үлэлииллэригэр аналлаах бэртээхэй оҕуруокка туттар тэриллэри туттарда.

Теплица иһигэр тыһыынчанан араас арассаадалары киирбит эрэ киһи сөҕө көрөр. Олох сайыҥҥы күөх хонууну санатар. Арассаадалар сотору кэминэн улууска уонна нэһилиэккэ атыыга барыахтара, итиэннэ оскуола быйыл бэйэтэ үүнээйилэри дэлэйдик олордуоҕа. Хаһаайкалар үлэ хайдах барбытын сиһилии кэпсээтилэр.

Түгэнинэн туһанан, күүс-көмө буолбут улуус дьаһалтатыгар, улууспут меценатыгар Руслан Еремеевич Федотовка, оскуолабыт салалтатын уонна коллективын аатыттан махталбытын тиэрдэбит! Оскуола эр дьоно бары биир киһи курдук элбэхтик субуотунньуктаан, тутууну түргэнник ыпсардылар. Онон кинилэргэ эмиэ махтанабыт! Бу саҥа сырдык, ыраас, аныгылыы тутуулаах опытнай-экспериментальнай кылааска элбэх оҕо үөрэнэн, өссө үрдүк ситиһиилэниэхтэрэ, араас хабааннаах чинчийэр үлэлэргэ салгыы кыттан, билиилэрэ-көрүүлэрэ өссө кэҥиэҕэ, элбэх оҕуруот аһын дэлэтэн, сибэкки арааһын үүннэрэн, инникитин Бөтүҥ орто оскуолата өссө үүнүө-сайдыа, чэчириэ”, — диэн үлэһиттэр үөрүүлэрин үллэстэллэр, суруйда https://www.instagram.com/amma_olo5o/

Следите за самым важным и интересным в Telegram-канале и WhatsApp-группе ЯСИА