Уһук Илиҥҥи федеральнай уокурук 2030 сылга диэри социальнай-экэнэмиичэскэй сайдыытын стратегиятын, 2036 сылга диэри барыллааһынынан, олоххо киллэриигэ дьаһаллар былааннарын оҥоруу сүбэ мунньахха кэпсэттилэр. Мунньах РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев салалтатынан ыытылынна.
—2030 сылга диэри Уһук Илини сайыннарыы стратегията, 2036 сылга диэри барыллааһынынан, ылылынна. Бу инфраструктураны, энергетиканы, технологиялары сайыннарыыны, социальнай сайдыы бырайыактарын, сир баайын таҥастааһын таһымын үрдэтиини кытта сибээстээх түһүмэхтэртэн турар. Билигин стратегияны олоххо киллэрии былааныгар бэлэмнэниини саҕалыахха наада, — диэн дьүүллэһиини Юрий Трутнев арыйда. Стратегия РФ Бэрэсидьиэнин сорудаҕынан оҥоһуллубута. Докумуону быйыл балаҕан ыйыгар Бырабыыталыстыба Бэрэссэдээтэлэ Михаил Мишустин бигэргэппитэ. 2027 сылга кулун тутар 1 күнүгэр диэри стратегияны олоххо киллэриигэ дьаһаллар былааннарын бырайыагын ырытан оҥоруохха уонна РФ Бырабыыталыстыбатыгар киллэриэххэ наада.
—Саха сирэ тырааныспар уонна энергетика инфраструктуратын, бырамыысыланнаһы уонна саҥа технологиялары, доруобуйа харыстабылын, үөрэхтээһини уонна дьиэ кэргэттэри өйүүр быһаарыылары бу былааҥҥа киллэрэргэ этии киллэриэҕэ. Ити барыта өрөспүүбүлүкэ салгыы сайдарыгар уонна дьон олоҕун хаачыстыбатын үрдэтэргэ усулуобуйаны тэрийиэхтээх, — диэн бэлиэтиир Ил Дархан Айсен Николаев.
СӨ экэниэмикэ министиэристибэтигэр бэлиэтээбиттэринэн, былааҥҥа бөдөҥ инфраструктурнай уонна технологическай бырайыактар киириэхтээхтэр, чуолаан Өлүөнэ муостата, Аллараа Бэстээх–Магадан тимир суол лииньийэтэ, Тикси пордун саҥардан оҥоруу уонна Найбаҕа таһаҕас терминалын тутуу.
Энергетика комплексыгар Новоленскай уонна Саха сирин соҕуруу өттүгэр ТЭС, иккис-үһүс түһүмэхтэринэн Дьокуускайдааҕы ГРЭС-2, ону тэҥэ 392 МВт кыамталаах Канкуннааҕы ГЭС тутуута болҕомтоҕо ылыллар.
Былааҥҥа ону тэҥэ өрөспүүбүлүкэ бары зоналарыгар минеральнай-сырьевой кииннэри баһылааһын диверсификацияламмыт экэниэмикэни тэрийии бырайыактара , уо.д.а. киллэриллэллэр: элбэх функциялаах кинопавильону, аан дойду таһымнаах үрдүк үөрэхтэр икки ардыланааҕы кампустарын тэрийии, орто профессиональнай үөрэхтээһиҥҥэ үөрэтэр-производственнай комплексы тутуу. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.
Сиһилии: https://www.sakha.gov.ru/news/64318
