2024 сылга Туймаада ыһыаҕар Дыгын оонньууларын кымыс иһэр киин трибунаҕа ыытыахтара. Национальнай бырааһынньыкка ыалдьыттары саҥалыы тэрээһиннэр күүтэллэр.
«Россия 24» телеханаалга куорат баһылыга Евгений Григорьев «Прямой эфир с городом» биэриигэ ыһыах туһунан кэпсээтэ, суруйар ЯСИА.
«Быйыл бэс ыйын 29 — 30 күннэригэр Туймаада ыһыаҕын 29-с төгүлүн ыытабыт, «Үс Хатыҥҥа». Култуура бырагырааматыгар 19 түһүлгэнэн 100-тэн тахса дьаһал тэриллиэҕэ. Бырааһынньык концепцията Россияҕа дьиэ кэргэн, Саха сиригэр оҕо аймах сылларын кытта сибээстээх буолуоҕа. Биллэн турар, «Азия оҕолоро» VIII норуоттар ардыларынааҕы спорт оонньууларын тиэмэтэ эмиэ таарыллыаҕа. Элбэх ыһыахчыт кэлэрин күүтэбит», — диэтэ Евгений Григорьев.
Кини эппитинэн, ааспыт сылга Туймаада ыһыаҕар 235 тыһыынча киһи сылдьыбыт. Быйыл да оччо киһи буолара сабаҕаланар. Евгений Григорьев бэлиэтээбитинэн, ыһыах Россияҕа саамай бөдөҥ култуура национальнай бырааһынньыга буолар.
Дыгын оонньууларын миэстэтэ уларыйбытын таһынан, Алтан Сэргэҕэ сирдээн илдьэр 99 сэргэ саҥардыллыаҕа, итиэннэ быйыл аан бастакытын эрдэҕэс оҕолорго анаан Бэргэн оонньуулара тэриллиэҕэ. Оһуохайдьыттарга анаан балаҕан тутуллуоҕа.
