«Тылы уонна култуураны харыстааһын: глобализация үйэтигэр кинигэ таһаарааччылар миссиялара» аан дойдутааҕы төгүрүк остуол балаҕан ыйын 10 күнүгэр Дьокуускай куоракка өрөспүүбүлүкэтээҕи медиа-кииҥҥэ буолан ааста. Тэрээһин Арассыыйа Федерациятын Төрөөбүт тыллар күннэригэр уонна С.А. Новгородов аатынан “Айар” Национальнай кинигэ кыһата тэриллибитэ 100 сылыгар ананар.
Көрсүһүү булкаас көрүҥүнэн ыытылынна. Онно былаас бэрэстэбиитэллэрэ, Татарстаантан, Удмуртияттан, Башкортостаантан, Казахстаантан уонна Рязань уобалаһыттан кинигэ таһаарааччылар, суруйааччылар, педагогтар уонна бибилэтиэкэрдэр кыттыыны ыллылар.
Төгүрүк остуол сүрүн түмүгүнэн резолюция ылыллыыта буолла. Кыттааччылар Арассыыйа Бырабыыталыстыбатын Култуура министиэристибэтигэр Арассыыйа норуоттарын тылларынан литэрэтиирэ айымньыларын хардары тылбаастыырга үп-харчы көрөрүгэр этии киллэрдилэр, ону тэҥэ сыллата ыытыллар «Төрөөбүт тылынан ааҕыы нэдиэлэтэ» диэн аахсыйаны олохтуурга сүбэлээтилэр.
Арассыыйа кинигэ таһаарааччыларын ассоциацияларыгар эрэгийиэннээҕи кинигэ кыһаларын икки ардыларыгар уопут атастаһар онлайн-былаһаакканы тэрийии боппуруоһун үөрэтэргэ этилиннэ. Саха Өрөспүүбүлүкэтин бырабыыталыстыбатыгар национальнай литэрэтиирэни атыылаһарга муниципальнай бибилэтиэкэлэр үптэрин-харчыларын улаатыннарарга, оттон өрөспүүбүлүкэ Үөрэх министиэристибэтигэр оскуола бибилэтиэкэлэрин кылаас таһынан ааҕыыга аналлаах кинигэлэринэн хааччыйарга этилиннэ.
Кэпсэтии түмүгүнэн электроннай хомуурунньук тахсыаҕа, ону Арассыыйа кинигэ таһаарааччыларын ассоциациятын порталыгар бэчээттиэхтэрэ.
