Саха сиригэр “Биир ньыгыл Россия” баартыйа народнай бырагырааматын олоххо киллэрии түмүгүн таһаарар. “Молодая гвардия” Бүтүн Арассыыйатааҕы уопсастыбаннай тэрилтэ Саха сиринээҕи салаатын салайааччыта уонна ХИФУ устудьуоннарын профкомун бэрэсэдээтэлэ Максим Колесов этэринэн, ыччаты өйөөһүн көдьүүһэ дакаастанна уонна салҕыы ыытыллыаҕа.
Максим Колесов санаатынан, “Биир ньыгыл Россия” ситиһиитэ – дьиҥнээх үлэҕэ уонна олохтоох дьон тутаах кыһалҕаларын быһаарарга бэлэм буоларыгар олоҕурар. “Баартыйа дьону долгутар кыһалҕалары быһаарарга бэлэмнээх буолан, бэйэтин үлэтинэн кыайарын өссө төгүл дакаастаата. Олохтоохтор санааларыгар тирэнэн, баартыйа тэрийэн оҥорбут народнай бырагыраамата, дьон хайдах түмүгү кэтэһэрин чуолкай былаанынан көрдөрдө” – диэн этэр.
Инники народнай бырагыраама чэрчитинэн өрөспүүбүлүкэҕэ ыччаты өйөөһүн эйгэтигэр баартыйа балачча улахан ситиһиитин көрдөрдө диэн Колесов бэлиэтээтэ. Ол курдук, “Профессионалитет” бырагыраама ыытыллан, 5 тыһыынча кэриҥэ ыччат үлэҕэ мэктиэлээх идэлэри ылаллар. Ол таһынан, үрдүк үөрэх кыһатыгар бүддьүөттээх миэстэ ахсаана элбээн, билигин оскуоланы бүтэрээччилэр 67% үрдүк үөрэххэ киириэхтэрин сөп. Ону тэҥэ, ыччаты эбии сайыннарар саҥа былаһааккалар арылыннылар.
Баартыйа ыччат салаатын лидерэ этэринэн, саҥардыллыбыт народнай бырагыраама ити үлэтин салҕыы ыытыаҕа. Саха сиригэр ыччаты түмэр кииннэр уонна аныгы бэйэни сайыннарар инфраструктуралар тэрийии былааннанар. Оҕо урамньытын кыһатын саҥа тэрилинэн хааччыйыы уонна өрөмүөннээһин салҕаныаҕа, тыйаатырдары уонна таһымнаах дьоҕурдары өйүүргэ эбии кыах баар буолуоҕа.
“Бу барыта биһиги ыччаппыт идэтигэр бэйэтин көрдөрөрүгэр уонна Саха сиригэр инники кэскилин оҥороругар кыаҕы биэриэҕэ. Ыччат — өрөспүүбүлүкэ сайдыытын мэктиэтэ буолар. Ол туһугар биһиги биир дойдулаахтарбыт куоластаабыттара” – диэн Максим Колесов бэлиэтээтэ.
Тылбаас: Слепцова Саргылана
