Грипп уонна ОРВИ ыалдьыы эмискэ элбээбитинэн сибээстээн, Дьокуускай куорат оскуолаларыгар уонна оҕо уһуйааннарыгар харантыын биллэрилиннэ. Бу туһунан куораттааҕы былаанныыр сүбэ мунньахха иһитиннэрдилэр.
13-с нүөмэрдээх оскуола уонна В.П. Ларионов аатынан физика-техническэй лицей толору сабылыннылар. Ону таһынан аҕыс оскуолаҕа кылаастар сорох чаастара тохтотулунна. Ааспыт нэдиэлэҕэ «Светлячок» диэн 13-с нүөмэрдээх оҕо уһуйааныгар эмиэ сорох бөлөхтөр сабыллыбыттара.
Куоракка грипп уонна ОРВИ ыалдьыыта биир нэдиэлэ иһигэр 2,4 төгүл үрдээн, эпидемиологическай боруогу 64% куоһарда. Куорат дьаһалтатын дааннайынан, балаҕан ыйын 7–13 күннэригэр 5495 киһи ыалдьыбыта бэлиэтэммит.
Ордук оҕолорго ыалдьыы элбээтэ. 7-тэн 14-гэр диэри саастаахтарга ыалдьыы 3,7 төгүл, 3-тэн 6-гар диэри уонна 15 саастарыттан үөһэ — 2,2 төгүл үрдээбит.
Биир нэдиэлэ иһигэр грипптэн быһыыны 15 тыһыынчаттан тахса киһи ылла.
