Владимир Путин Госдуумаҕа быыбар буолуон иннинэ Арассыыйа олохтоохторугар туһаайан, кинилэр толкуйдаммыт уонна эппиэтинэстээх быһаарыыны ылынан, куоластарын биэрэллэригэр ыҥырда. Бу туһунан РИА Новости иһитиннэрэр.
«Эһиги талыыгыт уонна баҕа санааҕыт — биһиги байыастарбыт кэннилэригэр мөлүйүөнүнэн дьон турарын, биһиги биир сомоҕо норуот буоларбытын, уопсай сыаннастарынан, устуоруйа өйдөбүлүнэн, төрөөбүт дойдуга тапталынан холбоһон сылдьарбытын көрдөрүөхтэрэ диэн эрэнэбин. Ким да биһигини үрэйэр, куттуур, судаарыстыбаннаспытын уонна уопсастыба-бэлиитикэ систиэмэбитин айгырата сатыа суохтаах», — диэтэ бэрэсидьиэн.
Кини маннык улахан далааһыннаах быыбардыыр хампаанньа анал байыаннай дьайыы усулуобуйатыгар баран эрэрин, оттон Донбасс уонна Новороссия олохтоохторо Арассыыйаны кытта холбоспуттарын кэнниттэн аан бастаан дьокутааттары талыахтарын тоһоҕолоон бэлиэтээтэ.
Дойду баһылыга быыбарга кыттыы — бу кыайыыга уопсай кылаат буоларын, хас биирдии быыбардааччы кыттыыта суолталааҕын санатта. Кини саамай дьоһуннаах хандьыдааттар уонна дьиҥнээх патриоттар элбэх куолаһы ылалларыгар эрэлин биллэрдэ.
«Бу биһиги Арассыыйаны мөлтөтөр, сайдыытын харгыстыы сатыыр, суверенитетын былдьыы уонна дьылҕабытын бэйэбит быһаарар бырааппытын быһа сатааччыларга уопсай хоруйбут буолуоҕа», — диэн Путин түмүктээтэ.
Быыбардар үс күн устата — балаҕан ыйын 18–20 күннэригэр — барыахтара. Уопсайа таһымынан араастанар 2,2 тыһыынчаттан тахса хампаанньа ыытыллыаҕа. Арассыыйа олохтоохторо 20,7 тыһыынча дьокутааты уонна дьаһалта баһылыктарын талыахтара. Тэҥинэн 33 эрэгийиэҥҥэ дистанционнай электроннай куоластааһын ыытыллыаҕа. ЦИК баһылыга Элла Памфилова бүтэһик дааннайынан, онно кыттарга 4 мөлүйүөнтэн тахса быыбардааччы сайабылыанньа биэрбит.
